DILI, 21 Maiu 2024 (TATOLI) – Diresaun Nasionál Pekuária, Ministériu Agrikultura, Pekuária, Peska no Floresta (MAPPF) hahú konstrui fatin ba karau susubeen iha sentru lima, ne’ebé gasta verba hamutuk rihun $400.
Diretór-Jerál Pekuária no Veterinária, Carlos António Amaral, informa katak kada sentru haki’ak animál ne’e harii ho osan rihun $80 iha rai ektare kuaze 20 no nia dezeñu tékniku diferente ho karau-luhan sira seluk.
“Karau susubeen nia luhan ne’e sei kompleta ho ekipamentu adekuadu kona-ba prosesu atu hois karau susubeen, fatin atu karau hahoris, fatin atu haketak karau oan ho karau inan. Depois fatin atu kesi karau, inklui plantasaun ka hahán sira”, Carlos Amaral dehan ba Tatoli iha Comoro, ohin.
Planu ministériu nian ba konstrui luhan ba karau susubeen ne’e atu iha futuru bele fornese mós susubeen ba Programa Merenda Eskolár atu tulun labarik sira-nia dezenvolvimentu, liuliu iha prosesu ensinu-aprendizajen. “Ita agora seidauk iha fábrika ba karau susubeen. Tanba ne’e, ita-nia planu prioridade maka karau susubeen ne’e ita prodús, ita sei apoiu ba merenda eskolár”, realsa.
Karau susubeen ne’ebé MAPPF atu sosa iha fulan-Juñu ne’e hamutuk 55 – karau inan 50 no aman lima, nune’e bele apoia produsaun di’ak liu. Bainhira konstrusaun fatin sira finaliza no kompleta ona mak bele hatama karau sira ne’e. Kada luhan sei tau karau inan 10 no aman ida hodi fó oan ba karau sira ne’e.
“Karau sira ne’e tenke hetan hahán ne’ebé sufisiente no kualidade, nune’e bele hasa’e liután produtividade. Ne’e duni, hahán ba karau susubeen ne’e ministériu sei prodús rasik husi batar-kain no hare-kain sira, inklui duut ne’ebé matak”, adianta.
Karau susubeen ne’ebé ministériu sei sosa ne’e konsidera karau ne’ebé tama ona prosesu reprodusaun, inklui karau ne’ebé iha ona oan iha kabun, nune’e bele fó produsaun lais. Sentru lima ne’ebé iha faze konstrusaun mak iha Dotik-Manufahi, Pato-Lautém, Ratahu-Viqueque, Korluli-Bobonaro no Natarbora- Manatuto.
Notísia relevante: Ministériu Agrikultura sosa karau susubeen 50 hodi distribui ba sentru pekuáriu
Jornalista: Tomé Amado
Editora: Maria Auxiliadora
