DILI, 07 juñu 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte Terestre (DNTT) hamutuk ho ekipa konjunta, sesta ne’e, halo lansamentu taka stiker ba transporte públiku kona-ba direitu ema ho defisiénsia.
Ekipa konjunta ne’e kompostu husi Polísia Nasionál Timor-Leste (PNTL) Sesaun Tránzitu (PolTrans), Asosiasaun Defisiénsia Timor-Leste (ADTL) inklui Juventude ba Dezenvolvimentu Nasional.
Ministru Transporte no Komunikasaun, Miguel Marques Manitelu, hateten, atividade ne’e ho objetivu atu públiku bele halo tratamentu dignu ba ema ho defisiénsia sira durante atu sa’e transporte públiku.
“Ohin ita taka stiker ba transporte públiku sira oinsá fó hanoin ba pasajeiru inklui motorista sira bele fasilita ema ho defisiénsia ka ema ne’ebé ho nesesidade espesiál bainhira sa’e mikrolete, karik tenke iha konsiénsia fó espasu ba sira bele tuur ho dignu,” Ministru informa iha Sentru Konvesaun Dili (CCD, sigla portugés).
Notísia relevante : Monta sinál ba ema ho defisiénsia nia prosesu iha ona aprovizionamentu
Nia konsidera, presiza uza konsiénsia hasoru ema ho defisiénsia iha fatin públiku sira nune’e ema hotu bele hetan direitu hanesan.
“Labele haluhan ita sira ne’e mós loron ruma bele sai defisiénsia liuhusi moras sira-ne’ebe kona ita, ne’ebé husu ba timoroan atubele respeita tanba agora ita forte, maibé loron ida moras kona mós bele hanesan sira nune’e di’ak liu ita iha konsiénsia atu ajuda malu,” nia akresenta.
Iha fatin hanesan, Prezidente Juventude Dezenvolvimentu Nasionál, Beliza Maria Mesquita Dias, konsidera, atividade ohin importante tebes ba maluk ho defisiénsia sira tanba molok hala’o atividade, antes ne’e entidade relevante sira halo ona diskusaun hamutuk ho foin-sa’e sira, liu-liu feto ho defisiénsia hodi fó hanoin no ezijénsi nune’e bele buka solusaun.
“Entaun, buat ne’ebé ita presiza ajuda sira maka liu-liu uza konsiénsia bainhira sira sa’e transporte públiku, fó fatin iha kondutór nia kotuk ka fatin besik odamatan ba sira tuur, nune’e bele ajuda sira sa’e no tuun lalais,” nia tenik.
Komandante Polísia Tránzitu Nasionál (PolTrans), Luís da Costa, hateten, atividade ne’e importante tanba nia alvu ba maluk ho defisiénsia sira, nune’e ba oin Polísia Tránzitu kontinua identifika, nune’e stiker sira ne’e bele taka hotu ba karreta mikrolete.
“Atu fó hanoin ba ita-nia motorista sira atu tenke respeita ita-nia maluk ho defisiénsia sira bainhira uza transporte públiku atu halo sira-nia atividade ka fatin ruma, espera katak motorista sira ne’e mós sei tau atensaun atu ema hotu bele respeita maluk ho defisiénsia sira, ita mós ba oin kontinua halo sosializasaun ba motorista sira nune’e bele kompreende,” nia dehan.
Jornalista : Arminda Fonseca
Editora : Julia Chatarina
