HEADLINE, KAPITÁL

IGEADI, I.P kontinua atende pedidu emerjénsia iha territóriu

IGEADI, I.P kontinua atende pedidu emerjénsia iha territóriu

Logotipu IGEADI, I.P. Imajen/Espesiál

DILI, 10 juñu 2024 (TATOLI)—Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI,I.P), desde fulan fevereiru to’o juñu 2024 kontinua kontinua atende pedidu emerjénsia iha territóriu.

“Iha tinan ne’e, udan tun la hanesan ho tinan antes sira tanba agora ne’e udan tun ho kedas sedimentasaun. Ita kontinua atende pedidu emerjénsia hahú husi fevereiru to’o juñu, husi Dili to’o munisípiu sira tanba udan hahú iha munisípiu Dili ne’e fevereiru to’o inísiu abríl 2024 no agora ne’e iha fali munisípiu sira,” Prezidente Konsellu Administrasaun IGEADI, I.P, Ana Paula, informa ba Agência Tatoli, iha ninia knaar fatin, Colmera, segunda ne’e.

Notisia relevante : MOP-IGEADE halo lansamentu ba brigada neen atende situasaun emerjénsia

Nia dehan, iha parte Dili, parte foho hun sira hanesan Cristo Rei, Balide, Manleuana no seluk tan, udan monu rai hahú iha loron 09 fevereiru.

“Udan tun mai ho kedas sedimentasaun nakonu iha kapitál Dili, maibé IGEADI, I.P kontinua serbisu nornaliza hotu kedas. Maibé agora ita haree udan iha fali munisípiu sira, liu-liu parte Kosta Súl nian hahú semana rua liubá kotuk to’o agora udan nafatin no ita atende labele, liu-liu parte Bobonaro, Covalima no seluk tan,” nia haktuir.

Aleinde ne’e, parte Lolotoe nian dalan monu maski aterru maibé monu nafatin, entaun daudaun ekipa ho mákina to’o ona iha ne’ebá atu loke estrada emerjénsia ka alternativu atu komunidade iha postu administrativu Lolotoe bele uza.

Iha parte Bee Mean atu bá Suia Covalima dalan kotu ho modelu mout de’it kada tinan udan tun para IGEADI, I.P aterru, tempu rai la halai maibé mout tun de’it, entaun IGEADI, I.P agora aterru daudaun maibé koordena ona Ministériu Obra Públika atu halo estudu kle’an ida estrada ne’e rasik.

“Agora ita-nia ekipa mós bá Zumalai halo normalizasaun ba mota tanba mota ne’ebá hamosu inundasaun afeta ba komunidade nia hela fatin,” nia tenik.

Iha munisípiu Viqueque parte Uatulari Aliambata estrada kuaze metru 100 foho ka rai monu taka tomak, nune’e IGEADI, I.P konsege rezolve.

“Iha munisípiu Manututo postu administrativu Natarbora mota Lafaek Hasan ne’e, ami-nia ekipa kuaze fulan-rua ona iha ne’ebá atu hasi sedimentasaun atu mota halai tuir nia dalan no labele estraga komunidade nia too’s sira,” nia haktuir.

Pedidu emerjénsia ne’ebé iha IGEADE,I.P atende ho lais no rekupera kedas tanba daudaun ne’e institutu rasik iha brigada na’in-neen destakadu iha munisípiu sira atu halo atendimentu ba situasaun emerjénsia sira.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!