DILI, 16 janeiru 2023 (TATOLI)—Ministériu Obra Públika (MOP), hamutuk ho Inistitutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P sigla portugés), segunda ne’e, halo lansamentu ba brigada neen, ho objetivu oinsá atu atende b situasaun emerjénsia sira ne’ebé akontese iha terrenu.
“Ohin, ita halo lansamentu ba brigada IGEADE, I.P nian hamutuk neen, tuir estatutu no diplomata ministeriál nian ne’ebé aprovadu, atu halo servisu iha munisípiu sira hodi responde ba situasaun emerjénsia sira, hanesan rai-monu, mota tun no seluk tan,” Ministru Obra Públika, Abel Pires, hateten, iha kampaun IGEADA, Caicoli, Dili.
Brigada neen ne’ebé ohin MOP no IGEADE, I.P halo lansamentu mak, Daitula, Rosa muki Bonaparte, Maria Tapo, Samba 9, Sebastião Gomes, nomós ekipa taskforce ida.
“Brigada sira ne’e, ita foti ita-nia éroi sira-nia naran tau tanba ho objetivu hakarak ita serbisu tuir éroi sira-nia ain-fatin, iha terrenu atende ita-nia komunidade ho di’ak liuliu iha situasaun emerjénsia sira,” nia dehan.
Iha fatin, Prezidente IGEADE, I.P, Ermenegilda da Costa Laurentina, hateten, ekipa ekipa brigade neen nia servisu mak oinsá mak bele apoiu komunidade, ne’ebé presiza iha munisípiu sira, hanesan, loke estrada foun, melloramentu estrada normaliza nomós atende situasaun emerjénsia sira ne’ebé komunidade presiza.
“Ho lansamentu ida ne’e, espera ami bele servisu ho responsabilidade no sei fó servisu di’ak liutan ba iha ita-nia rai no povu doben Timor-Leste,” nia dehan.
Prezidente IGEADE, I.P ne’e hateten, brigada neen ne’e, kada brigada ida sei resposabiliza ba munisípiu tolu, hanesan, brigada Daitula kobre ba munisípiu Baucau, Viqueque, Lautém, Rosa muki Bonaparte ne’e ba Manatuto, Manufahi, Ainaro, brigada Maria Tapo kobre ba Bobonaro, Covalima, no Ermera.
Nune’e brigada Samba 9, kobre ba Aileu, Liquiça no Dili sorin, no brigada Sebatião Gomes nu’udar, brigada rezerva ne’ebé servisu iha Dili laran, haree servisu emerjénsia sira ne’ebé iha Dili-laran, nune’e ekipa taskforce ne’e rasik hanesan operasionál sei lidera atividade sira hanesan mobilizasaun dezmobilizasaun hosi Dili ba munisípiu no munisípiu ba munisípiu, atu halo atividade mobilizasaun ekipamentu pezadu ba brigada destakadu sira.
“Kompozisaun alokasaun pesoál ba kada brigada sira mak kada brigada ida koloka ema na’in 26, hosi númeru ne’e kompostu mekániku, operadór, lojístiku, armajen, finansa, koordenadór brigada, adjuntu brigada. Ha’u garante no fiar katak ho brigada sira ne’ebé iha sei atende situasaun emerjénsia sira ne’ebé akontese ba ita-nia komunidade iha munisípiu sira,” nia dehan.
Nune’e oprasionál ba ekipa taskforce nee’ hamutuk na’in 20 mak koordenadór ida, adjuntu koordenadór ida, operadór tronton haat, operadór motór grader, haat, motorista fuel tank (tanki mina) lima, no motorista water tank (tanki bee) lima.
“Fasilidade ne’ebé ita fó ba kada brigada sira mak hanesan, mákina motor grader operasionál, eskavadór, buldozer, loader, vibration roller, dump truck no karreta oprasionál,” lider másima IGEADE, I.P hateten.
Jornalista : Arminda Fonseca
Editór: Rafael Ximenes de A. Belo
