iklan

HEADLINE, KAPITÁL

Ekipa SEATOU sobu ona uma-oan iha pedestre leten Bidau Lecidere

Ekipa SEATOU sobu ona uma-oan iha pedestre leten Bidau Lecidere

Ekipa konjunta SEATOU mobiliza ekipamentu pezadu hodi sobu uma-oan ne'ebé okupa pedestre leten iha Bidau Lecidere, tersa (11/06/2024). Imajen Tatoli/Francisco Sony

DILI, 11 juñu 2024 (TATOLI)—Ekipa konjunta ne’ebé lidera husi Sekretaria Estadu Asuntu Toponímia no Organizasaun Urbana (SEATOU), tersa ne’e, sobu ona uma-oan ne’ebé empreza husi Xina, Vico Construction harii provizóriu iha pedestre (trotoár) leten, iha Bidau Lecidere.

Sekretáriu Estadu Asuntu Toponímia no Organizasaun Urbana, Germano Santa Brites Dias, dada-lia ho tékniku husi Vico Construction, molok sobu uma-oan ne’ebé okupa pedestre leten iha Bidau Lecidere, tersa (11/06/2024). Imajen Tatoli/Francisco Sony

Uma-oan ne’ebé empreza harii provizóriu ne’e nu’udar sala eletrikál temporária, ne’ebé tuir planu atu suporta konstrusaun andar to’o pizu dahuluk no empreza rasik sei sobu, maibé tanba uma ne’e okupa espasu públiku no hetan protesta maka’as husi públiku liuhusi rede sosiál facebook maka ekipa SEATOU deside tun sobu.

“Ita hotu hatene iha públiku ema hotu halo protesta, entaun ohin ha’u konfirma ho Ministériu Obra Públika (MOP), hakarak hatene sé mak hasai desizaun autoriza sira halo uma. Maibé ikus ita haree karta ne’ebé sira hatudu, katak autoriza sira atu didin kalen salva sira-nia konstrusaun iha laran, la’ós atu harii uma provizóriu okupa espasu públiku, entaun ohin sobu no haruka muda bá laran,” Sekretáriu Estadu Asuntu Toponímia no Organizasaun Urbana, Germano Santa Brites Dias, informa iha Bidau Lecidere.

Governante ne’e afirma, atividade ne’ebé nia ho ninia ekipa halo la haree ba timoroan ka estranjeiru, maibé sé de’it mak okupa espasu públiku tenke sobu.

“Ha’u husu ita ne’ebé halo atividade iha espasu públiku, liu-liu okupa to’o valeta leten, tenke husik, nune’e Jestaun Merkadu no MOP hala’o nia serbisu hodi hamoos valeta sira,” nia apela.

Sekretáriu Estadu Asuntu Toponímia no Organizasaun Urbana, Germano Santa Brites Dias no ekipa halo observasaun molok sobu uma-oan ne’ebé okupa pedestre leten iha Bidau Lecidere, tersa (11/06/2024). Imajen Tatoli/Francisco Sony

Empreza Vico Construction hosi nasaun Xina sai manán-na’in hodi implementa projetu Marina Square. Governu no empreza hatuur fatuk dahuluk ba projetu konstrusaun iha loron 17 maiu 2022, ne’ebé lansa husi antigu Primeiru Ministru, Taur Matan Ruak.

Área konstrusaun lokaliza iha antiga rezidénsia saudozu Francisco Xavier do Amaral, Bidau Lecidere.

Empreza ne’e atu tau prioridade ba investimentu iha setór turizmu ho totál kapitál millaun $50.

Tuir planu liuhusi projetu ne’e sei kria empregu 170 imediatu no bainhira realiza obra konstrusaun durante faze operasionál sei kria empregu 250 ne’ebé liga diretamente ba projetu. Timoroan ne’ebé sei serbisu iha faze dahuluk hamutuk 100, enkuantu sidadaun estranjeiru na’in-180 mai hosi Xina, Índia no Srilanka.

Aleinde ne’e, sei loke oportunidade empregu foun no negósiu sira hodi hamosu vaga servisu iha transporte, komérsiu, lojístika no tékniku no finanseiru sira.

Iha mós oportunidade foun ba formasaun no kapasitasaun institusionál, ne’ebé uza prátika di’ak liu ba atendimentu no servisu internasionál, sei hasa’e padraun no nível kualidade iha oferta indústria oteleira Timor-Leste.

Notísia relevante : Empreza Vico Construction planeia hahú konstrusaun Marina Square iha outubru 2023

Atividade ne’ebé ekipa SEATOU halo bazeia ba dekretu-lei númeru 3/2024 17 janeiru alterasaun dahuluk dekretu-lei númeru 33/2008 27 agostu, kona-ba ijiene no orden públiku.

Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.

Ekipa konjuntu ne’ebé lidera hosi SEATOU mak hanesan, Polísia Nasional Timor-Leste (PNTL), FALINTIL Forsa Defeza Timor-Leste (F-FDTL), MOP, Terra Propriedade, Ekipa Jestaun Merkadu Munisípiu Dili no seluk tan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!