iklan

EDUKASAUN, HEADLINE

ME husu dirijente foun halo serbisu ho responsabilidade

ME husu dirijente foun halo serbisu ho responsabilidade

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos. Imajen Tatoli/Francisco Sony

DILI, 12 juñu 2024 (TATOLI)–Ministériu Edukasaun (ME) husu diretór no adjuntu foun husi eskola ensinu sekundáriu jerál (ESJ) no ensinu sekundáriu tékniku vokasionál (ESTV) atu halo serbisu ho responsabilidade hodi halo mudansa iha eskola.

“Serbisu ne’ebé Ministériu Edukasaun tula iha imi-nia kabas leten ne’e tenke simu ho responsabilidade, hala’o didi’ak serbisu, la’o hamutuk no serbisu hamutuk ho adjuntu sira hodi identifika problema, ida-ne’e importante. Simu knaar ne’e la’ós oportunidade maibé ho responsável. Hala’o serbisu ho didi’ak, halo inovasaun no halo mudansa ruma iha eskola,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, informa iha salaun Institutu Nasionál Formasaun Dosente no Profisionál Edukasaun Timor-Leste (INFORDEPE), Balide, kinta ne’e.

ME presiza kolaborasaun husi dirijente foun sira hodi bele lori susesu iha prosesu ensinu aprendizajen.

“Kuandu imi iha kraik halo serbisu la ho susesu, mak iha leten mós la susesu, imi iha kraik mak la halo serbisu ho di’ak ne’e ministériu nafatin hasoru problema. Tanba problema barak sei la hotu no serbisu barak sei la la’o bainhira diretór nia serbisu manda loos de’it no adjuntu sira serbisu mak la’o loos de’it, ne’e labele,”  nia akresenta.

Notísia relevante : TLCE identifika maioria ESTV menus fasilidade prátika

Sekretáriu Estadu apela, dirijente foun sira tenke kontinua nafatin serbisu ho dirijente sesante no karik iha buat ruma ladi’ak hasai no halo fali buat foun.

“La signifika dehan imi ba atu hatun ida fali katak uluk nia iha ne’e la halo buat ida, maibé imi ba serbisu kontinua saida mak antes ne’e sira halo, ida-ne’ebé ladi’ak tau sees, ida-ne’ebé di’ak avansa ba oin,” nia hameno.

Diretór Jerál Ensinu Sekundáriu Jerál, Deolindo da Cruz, hateten, serbisu hotu atu la’o di’ak ne’e presiza iha komunikasaun ba malu nune’e bele atinje objetivu.

“Ita-boot sira asume knaar ne’e ita bele serbisu hamutuk di’ak liután, ita presiza komunika malu atu nune’e ita bele atinje ita-nia objetivu ne’ebé mak hatuur ona iha programa IX Governu nian hodi eleva kualidade edukasaun iha ita-nia rain,” nia dehan.

Diretór foun Eskola Ensinu Sekundáriu Tékniku Vokasional Industria no Teknolojia (ESTVIT) 28 Novembru Becora, Tomas Pinto, komprometidu sei tau a’as prioridade ba problema ekipamentu no rekursu umanu atu buka meiu hodi rezolve tanba daudaun ne’e problema hirak ne’e mak ESTV iha territóriu tomak enfrenta.

“Dezafiu ne’ebé mak ESTV iha teritóriu tomak infrenta maka ekipamentu no rekursu umanu, ida-ne’e  mak importante tebes atu tau a’as iha nível edukasaun, liu-liu iha nível tékniku vokasionál ninia tanba ita hatene katak ministériu nia planu ne’e di’ak no programa kapas maibé ita presiza iha jestaun ne’ebé-di’ak atu jere iha nível eskola. Nune’e, ita sei buka dalan oinsá atu rezolve iha futuru hodi eleva kualidade edukasaun iha Timor ho di’ak,” nia tenik.

Totál dirijente foun sira hamutuk 148 kompostu husi na’in-56 husi ESJ (diretór 28 no adjuntu 28) no na’in-92 husi ESTV (diretór 41, adjuntu 41 no koordenadór 10).

Jornalista      : Osória Marques

Editora           : Julia Chatarina

iklan
iklan

Leave a Reply

iklan
error: Content is protected !!