iklan

EDUKASAUN, BAUCAU, HEADLINE, MUNISÍPIU

Profesór rekrutadu na’in-rua iha Baucau muda fatin destakadu

Profesór rekrutadu na’in-rua iha Baucau muda fatin destakadu

Diretór Edukasaun Munisípiu Baucau, Afonso dos Santos da Costa. Imajen Agência TATOLI/Natalino Belo.

BAUCAU, 13 juñu 2024 (TATOLI) – Profesór rekrutadu liuhusi programa bolsa kandidatu na’in-rua deside muda husi fatin destakadu tanba kondisaun saúde la permite.

Diretór Serbisu Munisipál Edukasaun Baucau, Afonso dos Santos da Costa, esplika, profesór na’in-rua hato’o pedidu ho razaun saúde iha Edukasaun Baucau no kontinua hetan aseitasaun husi Edukasaun nasionál.

“Iha balun ne’ebé kondisaun saúde tanba presiza kontrola nafatin, ida-ne’e mak husu atu koloka besik iha fasilidade saúde atu kontrola maibé ho durasaun tempu. Bainhira grávida remata tenke fila ba fatin destakadu loloos,” Diretór Serbisu Munisipál Edukasaun Baucau hateten iha Vila Nova, kinta ne’e.

Profesór bolsa kandidatu na’in-rua ne’e antes ne’e destaka iha fatin diferente hanesan Eskola Báziku Filiál (EBF) Uaiburu, suku Hae-Coni, postu administrativu Baguia no atuál koloka fali iha EBF Buasare, Bahu, postu Baucau Vila tanba kondisaun isin-rua.

Enkuantu profesór ida seluk antes ne’e destaka iha EBF Uatumisa, Uaioli no atuál destaka hikas iha Eskola Báziku Sentrál (EBC, sigla portugés) Uaioli, postu Venilale tanba presiza asesu besik estrada hodi fó atendimentu saúde ba oan ne’ebé sei ki’ik.

“Pedidu ne’e ita enkamiña ba nasionál no hetan aseitasaun mak ita foin halo desizaun,” Afonso da Costa akresenta.

Edukasaun Baucau halo koordenasaun ho parte inspetór eskolár inklui dirijente eskola rua atu buka solusaun hanesan koloka fali profesór balun hodi substitui matéria hanorin ba estudante sira hodi hein rezultadu finál ba prosesu teste faze daruak ba profesór bolsa kandidatu tuir mai.

Tuir despaxu ministeriál númeru 19/2024, loron-13 maiu kona-ba determina abertura konkursu bolsa kandidatu dosente ne’ebé anexa deklarasaun rekerente tuir artigu 47 kona-ba regulamentu rekrutamentu ingresu karreira dosente.

Nune’e mos, bazeia ba aprovasaun diploma ministeriál númeru 82/2023, loron-22 dezembru fó-sai pontu tolu inportante ba kandidatu sira hodi deklara hanesan; (i) prosesu selesaun no kolokasaun hanesan dosente iha eskola ida, sei depende ba vaga iha futuru tuir determinasaun hosi Ministériu Edukasaun no Komisaun Funsaun Públika, (ii) tama ba bolsa kandidatu la rezulta katak ha’u iha ona serbisu no relasaun serbisu ho Estadu no (iii) ha’u laiha direitu atu ezije tenke tama iha karreira dosente tanba de’it ha’u tama iha bolsa kandidatu.

Alende ne’e, tuir alínea b, númeru 2, artigu 21 no 22 kona-ba regulamento rekrutamentu, kada kandidatu deklara katak: (i) ha’u hatene katak ha’u labele ezije atu hetan kolokasaun iha munisípiu ne’ebé ha’u identifika iha rekerimentu ida-ne’e, karik ha’u hetan xamada hodi tama ba karreira dosente no (ii) ha’u prontu atu simu kolokasaun iha fatin ne’ebé de’it iha territóriu nasionál.

Jornalista : Natalino Belo 

Editór : Evaristo Soares Martins 

iklan
iklan

Leave a Reply

iklan
error: Content is protected !!