DILI, 19 juñu 2024 (TATOLI) – Konsellu Ministru hala’o sorumutuk iha Palásiu Governu, Dili kuarta ne’e, aprova projetu Rezolusaun Governu hodi nomeia Padre Acácio Domingos de Castro, SDB, hanesan Prezidente Konsellu Jerál Universidade Nasionál Timor-Lorosa’e (UNTL).
Alende ne’e, nomeia mós Alberto Carvalho Araújo hanesan membru Konsellu Jerál UNTL, nu’udar personalidade méritu no rekoñesidu iha setór privadu no Ministra Edukasaun (ME) Dulce de Jesus Soares ba membru Konsellu UNTL ne’ebé reprezenta Governu.
“Proposta rezolusaun ne’e aprezenta husi Ministru Ensinu Superiór, Siénsia no Kultura, José Honório da Costa Pereira Jerónimo, kona-ba nomeasaun membru Konsellu Jerál Universidade Nasionál Timor Lorosa’e tuir kompeténsia Konsellu Ministru,” tenik iha nota ne’ebé Agência TATOLI asesu husi media Gabinete Primeiru-Ministru.
Nomeasaun ne’e realiza tanba Enjeñeiru João Baptista Fernandes Alves ne’ebé hakotu ona nia peregrinasaun iha fulan hira ba kotuk, ne’ebé iha tempu ne’ebá hanesan Prezidente Konsellu Jerál UNTL nian, nomeadu hanesan membru reprezentante setór privadu bazeia ba Rezolusaun Governu No. 36/2022, loron 28 fulan-dezembru, tanba ne’e presiza nomeia reprezentante foun setór privadu no Prezidente Konsellu Jerál foun ida.
Tanba ne’e, Governu deside, tuir artigu da-19 husi dekretu-lei No. 16/2010, loron 20 fulan-outubru hodi nomeia ema hirak ne’e.
Jornalista: Hortencio Sanchez
Editór: Florencio Miranda Ximenes
