BOBONARO,02 jullu 2024 (TATOLI) – Diresaun Servisu Munisipál Edukasaun, Munisípiu Bobonaro, liuhusi atividade fiskalizasaun durante ne’e deteta erru barak akontese iha implementasaun programa merenda eskolár tinan fiskál 2024.
Superintendente Edukasaun Munísipiu Bobonaro, Noémia da Silva Manuel Leite, esplika, tuir loloos refeisaun ne’ebé atu fó ba labarik-sira iha buat tolu importante mak hanesan, ai-han fó forsa, ai-han fó protesaun no ai-han ida haburas.
Maibé realidade iha observasaun nota katak iha eskola balu fornesedor sira oferese ai-han la sufisiente, tanba fó mantolun fuan ida fahe ba estudante na’in-rua inklui ai-fuan sira-ne’ebé tuir loloos ema ida tenke han ai-fuan ida kada loron.
Nune’e mós iha eskola parte postu administrativu Balibó, hahán la tuir menu ne’ebé iha uza fali menu tuan.
Diresaun Servisu Munisipál Bobonaro mós deteta EJP sira iha eskola balu mós ezekuta orsamentu latuir totál estudante.
Notísia relevante: Autoridade Bobonaro lansa programa merenda eskolár 2024 iha EBC Raifun
“Ha’u haree Koordenadór Ekipa Jestaun Programa (EJP) mak sosa sasán te’in, iha eskola balu totál estudante iha 434, loloos labarik hetan osan ne’e $166,40 maibé EJP fó osan ba kuziñeira ne’e $50-resin de’it, EJP sira ezekuta osan latuir totál estudante ne’ebé mak iha. Ida-ne’e erru boot ne’ebé presiza ita hotu hamutuk atu haree fali,” nia hateten durante halo avaliasaun ba programa PME iha salaun Maria-Tapo, tersa ne’e.
Noémia hatutan, durante prosesu fiskalizasaun ekipa sira mós identifika katak tezoreira EJP balu tenta halo manipulasaun ba osan.
“Ha’u bolu sira mai sura osan, sira sura osan ne’e, depois ha’u akompaña loos duni, $80 laiha tiha, ba ne’ebé ita la hatene, komesa sira bobar lia tún sa’e, ha’u-nia evidénsia iha hotu, foto kuaze kompletu, maibé agora sira rezolve ona osan ne’e atu devolve fila-fali, atu ko’a de’it fali sira-nia insentivu,” nia katak.
Nia observa iha eskola balu hanesan Ensinu Báziku Sentrál Raifun (EBC, sigla portugés) Raifun, hatudu progresu di’ak, tanba implementa tuir menu no ezekuta orsamentu tuir matadalan programa ne’e.
Ofisiál Ajénsia Fiskalizasaun Munisipál, Autoridade Munisípiu Bobonaro, Luisinho da Costa Fernandes, reforsa parte fiskalizasaun mós nota problema kuaze hanesan ho parte servisu munisipál edukasaun Bobonaro.
Maibé nia hatutan, liuhusi atividade monitorizasaun no averiguasaun identifika katak iha eskola balu fornesedór sira komete infrasaun tanba haruka estudante sira lori ai-maran hodi prepara ai-han.
“Ha’u la hatene ne’e tanba saida, maibé ida-ne’e ita ba konsege rezolve tiha problema ne’e no husu sira devolve fila fali osan ida alunu lori ai-maran ne’e, tanba osan ba item ida ba ai-maran nia mós iha,” tenik nia.
Ba kestaun ne’e, Diretór Aprovizionamentu, Autoridade Munisípiu Bobonaro, Egídio Loi Siga, husu ba ekipa sira atu kontinua halo monitorizasaun no averiguasaun kada loron hodi hatuur implementasaun programa ne’e tuir madalan ne’ebé eziste, tanba orsamentu ba programa ne’e ho montante boot.
Nia apela ekipa sira tenke maásima kontrolu tanba servisu EJP atu kontrola de’it menu no kontrola ezekusaun orsamentu.
“Sira EJP ne’e ha’u atu hapara ohin, aban no bainrua bele, tanba ha’u mak prepara prosesu ba EJP atu asina kontratu, ne’ebé koordenadór-sira ne’ebé dehan para, ne’e para, kuandu ita hamosu problema sira hanesan ohin ekipa konjunta deteta ne’e, tanba ne’e osan estadu tenke gasta ba duni ninia alvu,” nia argumenta.
Enkuantu Autoridade Munisípiu Bobonaro iha tinan 2024 ne’e aloka orsamentu ba merenda eskolár ho montante $1,531.786,84 ezekuta ba loron efetivu 191 no orsamentu ne’e fahe ba Enisnu Pre-eskolár $130,519,00 ho totál estudante 2,283 no Enisnu Báziku ho montante osan $1,401.267,84 ho totál estudante 24,532.
Notísia relevante: EJP 33 selebra kontratu ho PAM Bobonaro ezekuta merenda eskolár
Jornalista: Sérgio da Cruz
Editór: Evaristo Soares Martins
