iklan

BOBONARO, KOMBATE HOAX, MUNISÍPIU, SAÚDE

Postu Saúde Manapa funsiona normál kada loron

Postu Saúde Manapa funsiona normál kada loron

Prosesu atendimentu saúde iha postu saúde suku Manapa, postu administrativu Cailaco, munisípiu Bobonaro. Imajen Tatoli/Sérgio da Cruz.

BOBONARO, 09 jullu 2024 (TATOLI)-Relasiona ho individu balu ne’ebé espalla informasaun iha mídia sosiál katak postu saúde Manapa, postu administrativu Cailaco taka ka abandona kuaze tinan ida no karau ho Bibi mak hela, maibé dirijente saúde Bobonaro konsidera informasaun ne’e laloos.

Iha tersa ne’e, Diretór Saúde Munisípiu Bobonaro, Gíl Bernardo Vicente, hamutuk ho Xefe sentru Saúde Cailaco, tún direita ba terrenu hodi observa kondisaun no prosesu atendimentu saúde ba pasiente sira.

Prosesu atendimentu saúde iha postu saúde suku Manapa, postu administrativu Cailaco, munisípiu Bobonaro. Imajen Tatoli/Sérgio da Cruz.

Hafoin halo observasaun kuaze oras ida liu, Diretór Saúde Munisípiu Bobonaro, Gíl Bernardo Vicente, konsidera informasaun ne’ebé lansa iha mídia sosiál ne’e hoax ka laloos, tanba atendimentu saúde durante ne’e la’o normál hahú segunda to’o sesta.

Notísia relevante: Profisionál saúde iha Sentru Saúde Cailaco la sufisiente

“Ha’u hakarak fó hatene ba komunidade sira katak, ita-nia fasilidade saúde sira iha munisípiu Bobonaro funsiona ho di’ak inklui postu saúde Manapa ne’ebé maka foin daudaun sira tau iha mídia sosiál katak taka ona durante tinan ida. Informasaun ne’e lalloos, tanba ami-nia ekipa sira; médiku, parteira no enferimrira sira destaka iha-ne’e, sira maka servisu durante iha-ne’e, atividade hotu-hotu la’o ho di’ak,” nia ko’alia iha postu saúde Manapa.

Nia husu ba komunidade sira labele fiar informasaun hoax sira ne’e, tanba durante ne’e pesoál saúde sira kontinua halo atendimentu iha postu saúde no halo atividade klínika movél, pakote integradu saúde komunitária no hamutuk ho parseiru Word Vizion halo vizita tama sai uma kada fulan hamutuk hodi fó tratamentu saúde ba pasiente sira-ne’ebé moras iha uma.

“Ita-nia funsionamentu iha fasilidade saúde hotu, ita destaka hotu ona ita-nia rekursu sira-ne’e ba iha fasilidade saúde sira hotu, ne’ebé karik ba komunidade sira-ne’ebé presiza bele hakbesik-aan mai fasilidade saúde, hodi hetan atendimentu, agora ita-nia medikamentu mós sufisiente hela,” nia hateten.

Pesoál Saúde iha Família husi Programa Word Vizion, Jacinta Natalia Leto, reforsa problema postu saúde taka ne’e akontese iha fulan-dezembru tinan kotuk, maibé agora funsionamentu normál hikas tanba foin lalais ne’e governu destaka ona pesoál saúde na’in-rua no voluntária na’in-ida.

“Durante ne’e ha’u la’o ho sira, tinan ida ami la’o hamutuk SISCA iha ne’e ha’u mak atende fulan ida ha’u la’o dala rua, komunidade sira mai iha-ne’e, parteira sira mós atende ho di’ak, la’o normál hela,” nia akresenta.

Komunidade aldeia Lugululi, suku Manapa, Eduarda Maia, rezeita informasaun ne’e tanba postu saúde loke ka funsiona normál no atendimentu saúde kada loron ba komunidade sira mós di’ak.

“Sira servisu loro-loron, doutora ho parteira sira mós mai loro-loron, lokraik jam 18:00 mak sira fila, jam 12:00 sira deskansa, jam 14:00 sira loke fali, só ké ami-nia komunidade mak menus, ema ladún mai, moras mak mai, la moras ema la mai,” nia hateten.

Enkuantu postu Saúde Manapa halo atendimentu saúde kobre aldeia rua hanesan Lugululi no Tateluri, inklui komunidade balu iha aldeia Daitete, Mahui no Riti-Udu, suku Ritabou, postu administrativu Maliana.

Notísia relevante: Postu Saúde balun iha Cailaco reativa atendimentu kada semana

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!