OÉ-CUSSE, 11 jullu 2024 (TATOLI) – Xefe suku Cunha, Domigos Seco Caunan, husu ba Diresaun Rejionál Konservatóriu, Servisu Rejistu Sivíl Notariadu Oé-Cusse (DRCSR, sigla portugés) atu disponibiliza Billete Identidade (BI) orijinál, tanba daudaun ne’e kontinua prodús BI provizória ka suratahan ne’ebé fásil atu nakles no aat lalais.
“Ha’u observa atendimentu di’ak, lahanesan uluk ne’ebé dokumentu barak toba iha ne’ebá, maibé persiza BI nia orijinál. Tanba durante ne’e halo ho suratahan de’it, entaun komunidade balun ladún tau atensaun, bele halo nakles kuandu bee kona. Depois, prosesu atu trata BI ne’e mós persiza tempu, entaun nia orijinál ne’e tenke iha ona. Ita espera Governu bele rezolve ona, tanba kle’ur ona seidauk iha”, Domingos Seco Caunan dehan ba jornalista sira iha Oé-Cusse.
Diretór Rejionál Konservatóriu Serbisu Rejistu Sivíl Notariadu Oé-Cusse, Rui Sequeira, rekoñese problema ne’e tanba blanku orijinál mak stockout. “Durante ne’e ami sei print ho provizóriu, tanba blanku orijinál Billete Identidade seidauk iha, entaun prodús ho tipu provizóriu de’it”, nia hateten.
Notísia relevante: Autoridade RAEOA nomeia Rui Pereira lidera notariádu Oé-Cusse
Rui Pereira fó sai dadus katak impresaun BI provizóriu daudaun ne’e akumula ona ema na’in-11.855, númeru ne’e bele liu tanba sira-ne’ebé persiza passaporte ho rejistu kriminál tenke iha BI.
“Kondisaun mákina produsaun estavel, maibé falta nia tinta mak seidauk iha no blanku orijinál. Tanba ne’e, ami atende uza printer de’it, nune’e bele fó atendimentu ba komunidade maske ho tipu provizóriu de’it. Problema ne’e ami informa ona ba iha nasionál, ne’ebé ita hein de’it bainhira iha ona, ita bele prodús orijinál”, nia konklui.
Notísia relevante: Rejistu Sivíl Notariadu Oé-Cusse hatama reseita rihun $39-resin ba kofre Estadu
Jornalista: Abílio Elo Nini
Editora: Maria Auxiliadora
