COVALIMA, 15 jullu 2024 (TATOLI) – Governu liuhusi Ministru Petróleu Rekursu Minerais (MPRM), Francisco Monteiro, informa katak, hahú agostu ka setembru Governu loke ona konkursu ba empreza ne’ebé hakarak investe iha Suai Supply Base ka baze fornesimentu Suai.
“Agora ita hanoin atu harii ona Suai Supply Base, agora iha ona faze perfurasaun atu teste ba rai nian. Entaun iha agostu se la’e setembru ita loke tenderizasaun boot ida atu konvida ema hotu hakarak mai investe iha Suai Supply Base bele mak aplika,” Ministru Francisco Monteiro hateten perante jornalista sira iha Suai, segunda ne’e.
Daudaun ne’e Timor Gap mak halo hela perfurasaun hodi teste ba rai nia kualidade no rezultadu teste sei fó sai iha tempu-besik.
“Teste ba rai ne’e atu buka hatene kona-ba kualiade rai nian ne’e husi okos sa’e mai ne’e metin ka la’e, bele loke investimentu boot iha ne’e ka lae, ida-ne’e mak agora Timor Gap halo hela sira nia serbisu,” nia tenik.
Suai Supply Base molok ne’e, halo tiha konsultasaun ho Komisaun Avaliasaun Impaktu Ambientál, Ministériu Petróleu no Rekursu Minerál, hetan lisensa ambientál husi Sekretáriu Estadu Meiu Ambiente iha loron 12 fulan-jullu 2013 ba rai Suai Baze Supply ho luan ektare 1.105 iha Postu Administrativu Suai, Munisipiu Covalima.
Lisensa ne’e fó sai tuir Dekretu-Lei ho No. 5/2011, loron 9 fulan fevereiru, kona-ba Lisensiamentu Ambientál. Ho ida-ne’e, prosesu Suai Baze Supply hakat tan ba oin, ne’ebé sei hamosu projetu bo’ot sira hanesan, Baze Supply no Aeroportu. Lisensa ne’e mós sei fó benefísiu ba dezenvolvimentu ekonomia Timor-Leste, liuliu iha área indústria no agrikultura iha Kosta Súl.
Antes ne’e, Ministru Petróleu no Rekursu Minerál, Alfredo Pires informa ona katak, prosesu lisensa ambientál la’o kuaze tinan rua. Lisensa ambientál ba projetu bo’ot hanesan SBS ne’e importante, atu proteje Timor-Leste nia ambiente no fó konfiansa ba empreza internasionál sira.
Notísia relevante:Timor GAP no Timor Resource iha ona entendimentu ba dezenvolvimentu kampu petrolíferu rai-maran
Jornalista: Hortencio Sanchez
Editór: Rafael Ximenes de A. Belo
