OÉ-CUSSE, 18 jullu 2024 (TATOLI) – Servisu Edukasaun Rejiaun Administrativa Espesiál Oé-Cusse Ambeno (RAEOA) hato’o ona pedidu ba Ministériu Edukasaun (ME) atu koloka tan profesór bolsa kandidatu na’in-40 hodi reforsa prosesu ensinu-aprendizajen iha Oé-Cusse.
Diretór Servisu Edukasaun Oé-Cusse, Vincencio Cono, hateten ezame segundu períodu realiza daudaun no nia garante katak estudante sira tuir prova ho di’ak, maibé problema mak sei falta iha profesór.
“Ita iha ona pedidu ba faze daruak. Teste eletróniku iha Díli ba bolsu kandidatu professor ne’e ita hato’o proposta persiza na’in-40, maibé ne’e só ba de’it pré-eskolár no ensinu báziku primeiru, segundu no terseiru siklu”, Vincencio Cono informa, ohin.
Notísia relevante: Profesór bolsa kandidatu na’in-31 kolokadu ona iha Oé-Cusse
Nia esplika katak manorin ba terseiru siklu prefere liu ba língua no ba primeiru no segundu siklu presiza profesór sira-ne’ebé finaliza ona sira-nia estudu kona-ba formasaun ensinu báziku nian.
“Ita prefere iha nivél sira-ne’e hotu, primeiru, segundu no terseiru siklu, nomós pré-eskolár. Ba futuru, espera Ministériu Edukasaun iha ona planu atu rekruta tan profesór iha nivel terseiru siklu tékniku vokasionál no sekundáriu nian atu kompleta”, nia salienta.
Notísia relevante: Matéria lima iha ESG Baqui Oé-Cusse laiha profesór
Iha sorin seluk, Diretór Eskola Báziku Sentrál (EBC, sigla portugés) Palaban, Fredo Maria Imakulada Sila, dehan iha ezame primeiru períodu eskola falta profesór atu hanorin estudante sira.
“Maibé, tama ba segundu períodu, pedidu ne’ebé ami hato’o ba edukasaun responde duni. Transferénsia iha EBC ne’e hetan manorin na’in-haat, ida-ne’e sufisiente ona iha eskola ne’e. Bele atende nesesidade eskola, katak kona-ba problema hanorin dixiplina ami laiha difikuldade. Ami-nia estudante iha 540 no profesór na’in-25”, nia adianta.
Notísia relevante: RAEOA relata problema tolu ba ME tau prioridade iha PAA 2025
Totál eskola sira iha RAEOA hamutuk 114, komposta husi eskola privada 12 no públika 102. Husi númeru ne’e eskola bázika filiál iha 71, EBC 20, eskola sekundária públika no privada lima, téknika vokasionál haat no pré-eskolár 14.
Jornalista: Abílio Elo Nini
Editora: Maria Auxiliadora
