DILI, 30 Jullu 2024 (TATOLI) – Polísia munisípiu Dili rejista krime iha fulan-Jullu hamutuk 388, ne’ebé maioria iha postu administrativu Dom Aleixo. Tanba ne’e komandu husu membru sira atu hasa’e vijilánsia másima hodi redús krime ne’e.
Komandante PNTL munisípiu Dili, Superintente Xefe Polísia Orlando Martins, relata katak kazu ne’ebé sira rejista ona ne’e inklui kazu flagrante hamutuk 334, detensaun 34 no kazu ne’ebé identifikadu hamutuk 20.
Aleinde ne’e, rejista kazu ofensa integridade fízika simples, violénsia doméstika, danu simples no danu agravadu. Husi kazu sira ne’e hotu komandu halo ona intervensaun hodi orienta membru sira hala’o serbisu ho rigór atu halo atuasan ba krime sira, nune’e nia númeru labele kontinua sa’e iha kapitál.
“Ita orienta ona membru sira iha eskuadra Dom Aleixo atu halo patrullamentu iha área sira ne’ebé risku ba krime iha zona Dom Aleixo, nune’e bele minimiza númeru krime”, superintente xefe dehan, ohin.
Nia salienta katak bainhira membru sira atu halo vijilánsia, importante liu mak buka atu halo liña koordenasaun ho membru Konsellu Polisiamentu Komunitáriu (KPK) ne’ebé destaka iha kada suku sira, nune’e bele hatene ho didi’ak área risku sira bainhira tun bá terrenu.
Komandante Polísia Dili ne’e mós orienta membru sira atu divulga informasaun iha eskola sira ne’ebé destaka iha postu Dom Aleixo, liuliu ba estudante sira, nune’e sira bele iha koñesimentu di’ak ba lei sira hodi bele serbisu hamutuk asegura krime iha Dili.
“Ha’u orienta ona membru sira bainhira sensibiliza informasaun ba estudante sira tenke halo mós komunikasaun ho autoridade lokál, nune’e bele identifika eskola ne’ebé presiza atu hetan informasaun sira, nune’e polísia bele tama hodi realiza atividade referida”, nia salienta.
Jornalista: Tomé Amado
Editora: Maria Auxiliadora
