DILI, 14 agostu 2024 (TATOLI)–Xefe suku Comoro, postu administrativu Dom Aleixo, munisípiu Dili, Eligio José Marçal, husu ba serbisu Eletrisidade de Timor-Leste, Empreza Públiku (EDTL, E.P) atu kontrola enerjia eletrisidade ne’ebé mate-lakan iha área Comoro nian.
Xefe suku ne’e hateten, eletrisidade ne’ebé mate-lakan derrepente no beibeik ne’e sei estraga populasaun sira-nia sasan eletrónika hanesan jeleira, televizaun, mákina fase roupa nian no selu-seluk tan.
“Ha’u simu lamentasaun ne’e, tanba ne’e mak bainhira hamate eletrisidade ne’e tenke fó hatene ka aviza antes ba populasaun sira hatee. Eetrisidade mate semana ida dala rua ka tolu. Dalaruma mate minutu 30 no dala balun mate to’o oras ruaí Dala ruma sira avizu iha media maibé la avizu direta ba populasaun sira,” xefe suku ne’e hateten ba Agência TATOLI, liuhosi telefónika, kuarta ne’e.
Nia hateten, eletrisidade ne’ebé mate-lana ne’e prejudika labarik estudante sira-ne’ebé hakarak estuda iha kalan no oras jantar nian.
Iha fatin seluk, xefe suku Madohi, Bernardino de Cristo Ferreira, hato’o katak eletrisidade mate iha sira-nia suku mate oras tolu ka haat nia laran.
“Ita komprende ahi mate, tanba aí tohar ruma. Maibé, ida-ne’e mate arbiru iha semana ida dala-rua ka dala-tolu,” nia hatten ba Agêbcia Tatoli iha sede suku Madohi.
Xefe suku ne’e hateten, liu tiha oras balun mak foin rona fiu kotu maibé antes ganate ahi ne’e EDTL, E.P laiha avizu, tanba ne’e husu ba EDTL, E.P atu serbisu profissionál no hala’o kna’ar ho di’ak.
Jornalista : Jesuína Xavier
Editór : Cancio Ximenes
