DILI, 20 agostu 2024 (TATOLI)–Antigu profesór kontratadu tinan 2023 husu ba veteranu sira atu hamutuk buka solusaun ba problema sosiál no umanidade ne’ebé sira hasoru.
“Problema injustisa ne’ebé to’o agora laiha solusaun, ami hakarak hato’o ba veteranu sira, husu atu tuur hamutuk hodi rezolve problema ne’ebé ami hasoru hodi konkretiza misaun FALINTIL nian katak ‘liberta pátria liberta povu’. Ohin loron ami profesór sira sente katak hetan diskriminasaun no injustisa ba rai ida-ne’e. Tanba ne’e, ami husu líder istóriku sira atu tuur hamutuk hodi fó solusaun ba problema sosiál no umanidade ne’ebé rofesór sira hasoru hela,” Portavós antigu profesór, Agostinho Pinto, hateten iha Jardim 05 de Maio, tersa ne’e.
Nia dehan, profesór sira luta liuhusi dalan oin-oin maibé nafatin laiha solusaun, tanba ne’e liuhusi komemorasaun loron FALINTIL ba dala-49 ne’e husu tulun ba veteranu sira ne’ebé luta ba rai ida-ne’e hodi fó liman ba malu atu buka solusaun ba problema sira.
“Ami husu ba na’i veteranu sira atu tulun ami rezolve problema ne’ebé ami hasoru nune’e hamutuk ita bele salva ita-nia edukasaun iha Timor-Leste ne’ebé daudaun ne’e sai problema boot tanba menus profesór, hodi estudante lubuk lakon matéria no abandonadu,” nia akresenta.
Notísia relevante : Antigu profesór kontratadu kontinua ezije ME implementa rezolusaun PN
Nune’e mós, antigu profesór ne’e husu ba Ministériu Edukasaun (ME) husu atu kumpre despaisu husi Primeiru Ministru (PM), Kay Rala Xanana Gusmão nian, ne’ebé orienta atu rezolve problema antigu profesór kontratadu.
“Tanba Governu ne’e lidera husi Primeiru-Ministru, entaun fó ona orientasaun ba Ministériu Edukasaun atu rezolve problema antigu profesór kontratadu sira-nia ho urjénsia, ne’ebé Ministériu laiha razaun, nia tenke ezekuta orientasaun hirak ne’e, nune’e bele hakotu lalais problema ne’e para profesór ida-idak bele bá fali nia fatin hodi kontinua kontribui ba setór edukasaun di’ak liután hodi garante futuru ida-ne’ebé di’ak ba timoroan sira hotu,” nia katak.
Iha sorin seluk, Líder rezisténsia no Tenente Jenerál Reformadu, Lere Anan Timur, nota katak durante ne’e estudante balun abandonadu tanba laiha profesór, nune’e sei fó impaktu ba dezenvolvimentu iha Timor-Leste.
“Labarik sira abandonadu tanba menus profesór ne’e ninia impaktu ba ita-nia dezenvolvimentu. Tanba ne’e, husu ba Ministériu Edukasaun atu rezolve tanba profesór sira la hanorin, oan sira ne’ebé inosente mak lori todan no dezafiu boot ba sira-nia fututru,” nia tenik.
Nune’e mós, Veteranu, Manuel Locateli Gusmão ‘Lotuk’, konsidera, atu dezenvolve setór edukasaun, saúde no agrikultura ne’e líder istóriku sira tenke tuur hamutuk.
“Komemorasaun loron FALINTIL ba dala-49 ne’e di’ak maibé triste oituan tanba ita-nia maun-boot sira balun ohin la partisipa. Tanba ne’e, presiza líder sira-ne’e hamutuk atu kaer ita-nia nasaun ne’e hodi la’o bá oin ho di’ak, labele la’o mesak-mesak. Tanba agora setór edukasaun saúde no agrikultura ne’e balun la’o balun mate hela iha fatin de’it, entaun atu la’o ne’e líder sira mak tuur hamutuk halo esforsu hodi rezolve,” nia tenik.
Jornalista : Osória Marques
Editora : Julia Chatarina
