DILI, 27 agostu 2024 (TATOLI) – Governu liuhusi reuniaun Konsellu Ministru (KM),tersa ne’e, diskute no aprova orsamentu hamutuk rihun $160 ba Komité Orientadór 25 (CO25) hodi finansia atividade sira ba festeza aniversariu referendum ba dala-25 ne’ebé sei realiza semana ne’e.
Porposta ne’e aprezenta husi Ministru Administrasaun Estatál, Tomás do Rosário Cabral ba Konsellu Ministru.
“Hodi atribui ba Komité Orientadór 25 (CO25, Sigla iha lian portugés) subsídiu públika ida ho montante rihun $160, ne’ebé uza hodi finansia despeza ba atividade sira ne’ebé atu hala’o husi CO25, iha ámbitu selebrasaun aniversáriu ba da-25 Konsulta Populár 30 agostu 1999,” tenik iha nota ne’ebé Agência TATOLI asesu hosi media Gabinete Primeiru-Ministru.
Molok ne’e, Prezidente Komité Orientadór 25, Constâncio Pinto, informa katak atividade ne’ebé Governu fó fiar ba CO25 atu realiza iha postu administrativu hotu durante loron tolu ne’e atu festeza hamutuk ho povu sira, depois tama ba loron 30 Agostu hodi komemora Konsulta Populár ne’ebé Governu mak organiza.
Constâncio Pinto adianta katak atividade ne’ebé CO25 trasa ona no sei realiza iha postu administrativu hotu ne’e maka hanesan halo diálogu, loke filme Resistir e Vencer kona-ba luta Timór nian ba ukun rasik-aan, halo mós sorumutu ho populasaun sira iha kada postu atu rona mós sira-nia lian, inklui halo espozisaun fotografia.
“Atividade sira ne’e ita realiza atu fó informasaun ida kle’an liu ba povu tomak iha territóriu hodi fó hanoin fali ba sira kona-ba luta ne’ebé timoroan sira halo to’o hetan ukun rasik-aan. Atu fanu filafali timoroan hotu hodi hanoin hikas tinan 25 liubá, timoroan sira bá ezerse sira-nia direitu iha sentru votasaun sira hodi define destinu rai ida ne’e liu husi referendu ba ukun rasik-an hodi deside futuru Timor-Leste nian ne’ebé ohin loron sai nasaun ida independente,” prezidente ne’e dehan.
Antes organiza festa populár iha postu sira ne’e, CO25 halo ona komunikasaun no koordenasaun ho administradór postu sira atu organiza eventu ne’e ho di’ak hodi realiza atividade populár ne’e iha postu idaidak.
Komité Orientadór 25 hanesan instituisaun ne’ebé kria liuhusi rezolusaun Governu iha 2017 no kompostu hosi organizasaun juventude rezistênsia hamutuk rua-nulu resin-lima. Objetivu CO25 maka halo investigasaun ne’ebé kl’ean kona-ba envolvimentu joven sira-nia iha luta ba libertasaun nasionál no nia rezultadu ikus maka sei hakerek livru ida kona-ba istória husi Rezistênsia Timor-Leste nian.
Komemorasaun Aniversáriu Konsulta Populár 30 Agostu 1999 nian ba da-25 sei hala’o iha Timor-Leste laran tomak ho prezensa husi membru Governu iha kada postu administrativu nasionál.
Data istórika ida-ne’e, marka momentu desizivu ida ne’ebé fundamentál iha istória Timor-Leste nian, sei realiza ho eventu lubun ida husi loron 28 to’o 30 Agostu, ne’ebé envolve lídere nasionál no internasionál sira, nune’e mós partisipasaun ativa husi populasaun.
Tema ba selebrasaun tinan ida ne’e mak “Povu maka Luta! Povu maka Terus! Povu maka Manán Funu!!! Povu mak Eroi ba Ukun-rasik an!!!”.
Jornalista: Hortencio Sanchez
Editór: Florencio Miranda Ximenes
