DILI, 10 setembru 2024 (TATOLI)- Peregrinu sira husi munisípiu Viqueque no Lautem hahú desloka ba fatin konsentrasaun Tasi-Tolu hodi partisipa misa solene ne’ebe dirije direta husi Sua Santidade Papa Franscisco, iha tuku 16:30.
“Peregrinu sira sa’e hotu tiha iha karreta laran, hahú arranka sai husi fatin akampamentu ba Tasi-Tolu. Transporte sira-ne’e sei sai dala ida. Atu labele hamosu engrafamentu iha viajén”, dehan Komadante Tranzitu PNTL munisípiu Viqueque, Primeiru Sarjentu Rogério Soares Guterres, informa
Iha deslokasaun ne’e, karreta tranzitu munisípiu Viqueque no komadante PNTL munisípiu Viqueque, Prezidente Autoridade Munisípiu Viqueque no tuir kedas peregrinu sira husi munisípiu Viqueque no Lautem.
Iha fatin hanesan, Ekipa avansadu munisípiu Viqueque, Marito da Costa, relata, kona-ba oráriu konsentrasaun iha fatin Tasi-Tolu tuku 9:00 to’o tuku 10:00 peregrinu sira konsentra iha fatin ne’ebé komisaun nasionál indika.
“Nune’e peregrinu sira husi munisípiu Viqueque tuku 6:00 sai husi akampamentu Hera no tuku 9:00 ne’e ita tenke to’o ona Tasi-Tolu. Transporte karreta ne’ebé tula peregrinu sira sei to’o de’it iha rotudan Nicolau Lobato no transporte sira tenke ba para iha área Aeroportu”, Marito da Costa, hateten ba Agênsia Tatoli, akampamentu Hera, ohin.
Tuir dadús peregrinu husi munisípiu Viqueque totál hamutuk rihun 6.261 mai husi postu administrativu lima kompostu postu Viqueque rihun 2298, Ossu na’in-956, Uatulari rihun 1.471, Uatucarbau na’in-522 no Lacluta rihun 1.014. Ho totál transporte hamutuk unidade 128 hodi tula peregrinu sira husi munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
