ME kontinua divulga prosedimentu no kritériu lisensamentu ba inspetor eskolár
DILI, 16 setembru 2024 (TATOLI)–Ministériu Edukasaun (ME) liuhusi Gabinete Avaliasaun Lisensamentu no Akreditasaun (GALA) kontinua halo atividade divulgasaun ba prosedimentu no kritéria sira ba inspetór eskolár iha territóriu tomak.
Koordenadór GALA, António Tomas Maia, hateten, atividade divulgasaun ne’e kuaze ramata ona iha munisípiu sira hotu no hela munisípiu Dili mak sei hahú iha tersa (17/09).
“Atividade divulgasaun ba prosedimentu no kritéria lisensiamentu ita halo kuaze ba alvu lubuk ida, iha ne’ebá ita-nia Alvu mak ba eskola no ba Servisu Edukasaun Munisipál sira nomós ba Inspetór eskolár sira. Divulgasaun iha munisípiu sira-ne’e kuaze hotu ona, no divulgasaun ba munisípiu Dili ne’e mak ita sei hahú iha aban ba oin,” Koordenadór informa iha ninia knaar fatin, Villa-Verde, segunda ne’e.
Notísia relevante : ME introdús estatutu ESJ Daraloi Iraler ba autoridade Uatulari
Objetivu husi atividade ne’e atu Inspetór eskolár sira bele hatene liután prosedimentu no kritéria nune’e sira bele implementa no kontrola eskola sira ho di’ak liután.
“Inspetór sira mak diretamente ba eskola sira atu haree katak eskola sira ne’e la’o tuir prosedimentu ka la tuir, nune’e mós iha prosesu lisensiamentu ne’e Inspetór eskolár sira mós halo nia papél ida ita bolu vistória, ne’ebé signifika bainhira eskola sira submete ona nia dokumentu mai iha Edukasaun Munisípál ba GALA atu halo avaliasaun prévia, kuandu pasa ita sei manda ba iha Inspetór Jerál Edukasaun atu orienta Inspetór eskolár sira atu bá halo vistória,” nia esplika.
Vistoria ne’e nia objetivu mak atu tuun ba terrenu hodi verifika diretamente realidade tuir saida mak iha dokumentu sira ne’ebé submete ba GALA.
“Depois husi dokumentu sira-ne’e mak ita halo konkluzaun ba prosesu aprovasaun lisensiamentu operasionál. Divulgasaun ne’e ita haree ba alvu, ita halo ba munisípiu hotu tanba mudansa estrutura, entaun ita presiza re-divulga atu nune’e sira bele hatene, ita nafatin halo no ba futuru ita mós hanoin hela atu halo kontíudu balun atu publika, nune’e ema hotu hatene oinsá atu loke eskola ida-ne’e nia kritéria sira-ne’e hanesan ne’ebé,” nia dehan.
Jornalista : Osória Marques
Editora : Julia Chatarina
