DILI, 18 setembru 2024 (TATOLI) – Ministériu Saúde entrega karreta ambulánsia multifunsaun ba Servisu Saúde Munisípiu sia atu utiliza ba nesesidade povu nian.
“Ohin ita entrega karreta multifunsaun ambulánsia ba Diretór Servisu Saúde Munisípiu sia hanesan Aileu, Ainaro, Baucau, Bobonaro, Ermera, Lautem, Manufahi, Viqueque no Covalima hodi utiliza ba nesesidade povu nian ho di’ak”, Ministra Saúde Elia dos Reis Amaral, dehan ba jornalista sira iha resintu Ministériu Saúde Caicoli, ohin.
Ministra husu ba Diretór sira atu utiliza kareta multifunsaun sira ne’e ho di’ak, tanba iha jeografikamente iha katak populasaun barak hela iha área rurál, entaun bainhira sira moras presiza ba lalais evakua mai sentru saúde sira ne’ebé mak besik, atu bele hetan atendimentu lalais husi médiku sira.
“Ha’u husu ba diretór munisípiu sira katak ida Governu sosa kareta multifunsaun ne’e ho sosa osan povu nian, entaun utilizadór sira tenke uza ho resposabilidade”, nia relata.
Governante ne’e esplika, munisípiu sira seluk seidauk hetan tanba sira-nia kareta balun sei di’ak atu atende ba pasiente sira, enkuantu sira seluk presiza tebes.
Iha fatin hanesan, Diretór Servisu Saúde Munisípiu Manufahi, Vitor Martins, agradese ba Ministériu Saúde ne’ebé ohin entrega tan kareta ambulánsia multifunsaun ida ba munisípiu Manufahi hodi uza ba nesesidade povu nian.
“Ko’alia kona-ba patrimóniu estadu, ami iha resposabilidade ba ida-ne’e atu jere ho di’ak ba tempu naruk nian”, Vitor Martins esplika.
Nia haktuir, kareta ambulánsia iha Munisípiu Manufahi iha lima maibé ida kondisaun ladún di’ak mak entrega ba patrimóniu estadu no ohin simu fali foun hodi utiliza ba atendimentu pasiente sira iha munisípiu Manufahi.
Jornalista : Felicidade Ximenes
Editór : Zezito Silva
