DILI, 07 outubru 2024 (TATOLI)–Diretór Servisu Edukasaun Munisípiu Dili, Sabino da Costa Pereira, preokupa ho kolokasaun profesór faze daruak rekrutadu liuhusi vaga bolsa kandidatu, ne’ebé la korresponde ba pedidu ne’ebé hato’o.
“Pedidu kolokasaun ba faze daruak ita husu 180, maibé ita hetan kolokasaun na’in-tolu de’it no ida-ne’e ba de’it eskola ne’ebé profesór sufisiente. Ita-nia profesór sira-ne’ebé mate seidauk troka no balun idade avansandu ona no iha balun stroke. Sira-ne’e ita sura hamutuk mak 180 no tuir realidade ne’ebé terrenu enfrenta,” Diretór Servisu Edukasaun hateten iha ninia knaar fatin, Comoro, segunda ne’e.
Nia dehan, Ministériu Edukasaun (ME) la koloka ba eskola ne’ebé profesór laiha, tanba ne’e parte eskola sira la’o tuir de’it buat ne’ebé iha hodi hein kolokasaun tuir mai.
“Ida-ne’e ha’u la satisfeitu ho kolokasaun ne’e tanba la tuir pedidu ne’ebé ami hato’o, ita hetan kolokasaun na’in-tolu ne’e sei fó serbisu todan ba Servisu Edukasaun munisipál. Tanba ne’e ita sei halo ezersísiu lubuk ida. Ha’u ladún hatene parte jurídiku nia haree hanesan ne’ebé mak koloka na’in-tolu ne’e,” nia akresenta.
Notísia relevante : Profesór 684 rekrutadu husi bolsa kandidatu faze daruak simu pose
Maski nune’e, Diretór esplika katak kolokasaun profesór ne’ebé la tuir pedidu ne’e sei la prejudika ba ezame nasionál ne’ebé sei hahú iha loron 14 outubru tanba ekipa sira elaborasaun ona matéria no hein realizasaun ezame.
Iha sorin seluk, Ministra Edukasaun, Dulce de Jesus Soares, hateten, kolokasaun profesór bazeia ba kuadru pesoál nia identifikasaun ba eskola nia nesesidade.
“Pur ezemplu, Eskola Ensinu Báziku Sentrál (EBC, sigla portugés) Farol nia númeru estudante hira, profesór hira mak iha ona, saladeaula hira, turnu hira no turma hira. Ida-ne’e ita halo depois halo análiza no halo rekrutamentu. Entaun, kolokasaun ida-ne’e primeiru ita haree uluk ba área remota, depois kontinua haree tuir mai,” Ministra dehan.
Governante ne’e argumenta, eskola balun bele jere tempu no eskola balun ne’ebé dook ba malu, hakarak lakohi ME tenke iha profesór sira fiksu iha ne’ebá.
“Agora ba eskola ne’ebé mak profesór laiha, Ministériu Edukasaun nia ekipa kuadru pesoál sei haree filafali. Ita sei haree ba sira-nia karga oráriu, tanba iha ne’ebá mós ita introdús métodu ensinu. Dalaruma iha saladeaula númeru estudante la barak, entaun profesór bele tau iha primeiru no segundu ano hamutuk hodi nia mak jere metodolojia no saladeaula. Ida-ne’e maneira ne’ebé ita uza hodi atende ba situasaun sira-ne’e,” nia esplika.
Jornalista : Osória Marques
Editora : Julia Chatarina
