LISBOA, 12 outubru 2024 (TATOLI) – Primeiru Ministru (PM), Kay Rala Xanana Gusmão sábadu ne’e, to’o iha Lisboa, Portugál no tuir ajenda, ohin lider nasionál ne’e simu prémiu kareirra Lusofonia.
Xefi Governu, Xanana Gusmão hamutuk ho komitiva to’o iha aeroportu Internsionál Humberto Delgado, Lisboa iha oras 01:10 meudia no simu husi Embaixaidora Timor-Leste iha Portugál, Isabel Amarál Guterres, Embaixadora Portugál iha Timor-Leste, Manuela Barros no Embaixaidora misaun Permanente Timor-Leste no CPLP, Laura Soares Abrantes.
Hafoin Primeiru Ministru to’o iha fatin deskansa iha otel Altis kontinua kedas halao enkontru ho membru governu ne’ebé hola parte nu’udar vizita ofisiál iha Portugál.
Tuir ajenda dahuluk, kareirra Luzofonia sei atribui ba Primeiru Ministru Xanana Gusmão ohin purvolta oras 21:00 kalan iha fatin Casino Estoril, Lisboa, Portugál.
Prémiu karreira Luzofonia hahú iha tinan-2013 ne’ebé funda husi na’in ba grupu Lisboa Awards, Ana Firml Ferreira, ne’ebé edisaun dahuluk hanaran Primeu Lusos iha loron-10 jullu 2013 partisipa husi ema 300 husi ajénsia 32.
Kuaze tinan-11 ona, prémiu referida evolui kreatividade hanesan sai referénsia husi merkadu país Língua Portugés (CPLP, sigla Portugés) espesiál iha Portugál no Brazil.
Membru governu sira-ne’ebé akompaña Primeiru Ministru durante halo vizita ofisiál ne’e kompostu Vise Primeiru Ministru, Ministru Koordenadór Asuntu Ekonomia, Turismu no Ambiente, Francisco Kalbuadi Lay, Ministru Negosiu Estranjeiru no kooperasaun (MNEK), Bendito Freitas.
Ministru Justisa, Sérgio Hornai, Ministru Ensinu Superiór, Siénsia no Kultura (MESSK), José Honorio, Ministru Interiór (MI), Francisco Guterres, Sekretáriu Estadu Komunikasaun Sosiál (SeKComS), Expedito dias Ximenes no Prezidente Kámara Komérsiu Indústria (CCI-TL, sigla portugés), Jorge Serrano.
Komitiva governu Timor-Leste sei hala’o vizita durante loron-lima hanesan enkontru ofisiál ho Prezidente Portugál, Primeiru Ministru, Prezidente Asembleia Repúblika Portugál no inkontru ho Prezidente Supremu Justisa Portugál no vizita área ekonomia verdes iha illa Azores
Tuir ajenda, Xanana hamutuk ho ekipa delegasaun sei hala’o sorumutu ho estudante no timoroan sira iha Portugál, enkontru ho reitór universidade sira iha Portugál.
Halo lansamentu ba livru diskursu Xanana Gusmão no puizía “Mauberiadas” no vizita área ekonomia verdes iha illa Azores.
Jornalista : Natalino Belo
Editór : Evaristo Soares Martins
