VIQUEQUE, 22 outubru 2024 (TATOLI)-Koordenadór Bee Timor Leste, Empreza Públika (BTL, E.P) munisípiu Viqueque, Marito da Costa, informa, servisu BTL, E.P munisípiu Viqueque konsege rekolla reseita liuhusi taxa hamutuk $17,390.50 hatama ba kofre Estadu, durante fulan sanulu – janeiru to’o outubru.
“Reseita bee-moos husi munisípiu Viqueque nian ne’ebé husi trimestre dahuluk to’o trimestre datoluk nian ami konsege rekolla reseita hamutuk $17,390.50 maka ami submete ona ba kofre Estadu. Reseita hirak ne’e mai husi kontadór ne’ebé ami monta ba uma-kain sira iha kapital Viqueque,” Marito da Costa, ba TATOLI, iha ninia knaar fatin, Beloi, tersa ne’e.
Marito relata, ekipa tekniku BTL, E.P munisípiu Viqueque instala ona metru kontadór ba zona Beloi, Bromatan, Beskem no Lamaklara ho totál uma-kain hamutuk 530.
“Nune’e ba ami-nia kalkulasaun kapitál Viqueque iha uma-kain hamutuk 1.300 seidauk instala metru kontadór tanba menus metru kontadór. Daudauk ne’e ami iha metru kontadór hamutuk 300 ne’ebé fulan oin ami sei instala ba uma-kain 300 iha área Boromatan,” nia subliña.
Alende ne’e nia dehan, tama tempu bailoron rekursu bee-matan Loi-Hunu debit hela 15 litru pursegundu, antes ne’e 20 litru, maibé impaktu husi bailoron bee hahú menus ba beibeik.
“Tanba ne’e ami husu ba utilizadór bee tenke poupa bee bainhira bee iha enxe ba ba jeriken sira. Atu nune’e bee menus loron rua ka tolu bele uza. Ami-nia predisaun tama fulan-novembru mak udan-been la mai, bee sei maran no sei impaktu maka’as ba komunidade sira iha kapitál Viqueque,” nia apela.
Kona-ba taxa ne’ebé BTL, E.P rekolla trimestre dahuluk husi janeiru $2,092.75, fulan-fevereiru $1,092.40 no fulan-marsu $1,527.20.
Ba trimestre daruak fulan-abríl $1,079.65, fulan-maiu $1,492.40 no fulan-juñu $3,855.60.
Iha trismestre datoluk fulan-jullu $2,540.50, fulan-agostu $1.177,00, fulan-setembru $1,482.10 no ba fulan-outubru $1,590.40.
Notísia relevante:BTL,E.P Viqueque arrekada reseita rihun $6 ba kofre Estadu
Jornalista : Vitorino Lopes da Costa
Editór: Rafael Ximenes de A. Belo
