DILI, 22 outubru 2024 (TATOLI) – Ajénsia Estadus Unidus ba Dezenvolvimentu Internasionál (USAID), afirma kompromisu atu ajuda Autoridade Aduaneira Timor-Leste hodi introdús Pontu Inkéritu Nasionál ka National Enquiry Point (NEP) atu ajuda komérsiu sira lalais no justu.
NEP hanesan sistema online foun ida ne’ebé dezeña atu liga setór privadu Timor-Leste nian diretamente ho alfándega sira. NEP ne’e lansa iha eventu Trade Talk ne’ebé hala’o iha Timor Plaza liuhusi USAID no hetan apoiu husi Embaixada Estadus Unidus Amérika.
“Ami hein atu serbisu besik ho Komisáriu Aduaneira bainhira nia lidera no esforsu sira hodi hadi’a fasilitasaun komérsiu, ne’ebé kontribui ba Timor-Leste nia kresimentu ekonómiku no kompetitividade globál”, Diretór USAID, Jazmian Allen dehan iha Timor Plaza, ohin.
USAID parseiru hela ho Autoridade Aduaneira Timor-Leste hanesan parte ida husi esforsu ida ne’ebé luan liu atu haburas kresimentu no dezenvolvimentu ekonómiku ne’ebé sustentável iha nasaun no rejiaun.
USAID nia asisténsia ajuda Timor-Leste alkansa nia metas fasilitasaun komérsiu no promove esforsu diversifikasaun ekonómika. Liuhosi inisiativa sira hanesan NEP, USAID ajuda harii ambiente komérsiu ida ne’ebé reziliente liu, transparente no inkluzivu, hodi garante katak negósiu sira ho medida hotu bele envolve ho merkadu globál sira ho fasil liu.
Iha fatin hanesan, Komisáriu Autoridade Aduaneira Joanico Pinto hateten NEP hanesan plataforma ida ba negosiante sira atu husu pergunta ba Autoridade Aduaneira no simu resposta eskrita diretamente husi ofisiál alfándega sira.
“Asesivel online liuhosi Portál Komérsiu Alfándega nian www.customs.gov.tl, plataforma ida-ne’e oferese ho gratuita, fornese dalan ida ne’ebé fasil no efisiente ba ema negósiu sira hodi rezolve sira-nia kestaun relasiona ho komérsiu”, Joanico Pinto afirma.
NEP permite utilizadór sira atu husu pergunta tékniku sira kona-ba prosedimentu alfándega nian no simu resposta eskrita lalais sira lahó presiza vizita eskritóriu ka pesoál oioin.
Servisu ne’e simplifika komunikasaun sira no hakarak hamenus atrazu sira, aumenta konfiansa negósiu nian no haburas relasaun komersiál sira ne’ebé metin liu, hodi rezulta iha aumentu transparénsia no efisiénsia iha sistema alfándega nian.
Jornalista : Felicidade Ximenes
Editór : Zezito Silva
