COVALIMA, 22 Outubru 2024 (TATOLI) – Vendedór ambulante iha merkadu Debos, postu administrativu Suai, munisípiu Covalima, okupa estrada públika bainhira hala’o atividade negósiu iha tempu kalan, nune’e hamosu engarrafamentu.
Diretora Servisu Munisipál ba Jestaun Merkadu no Turizmu, Teresa Pires, hateten funsionáriu husi Turizmu kontrola vendedór sira bainhira iha oras serbisu, maibé iha kalan sira aproveita hodi fa’an modo ho uza motorizada sira forma iha estrada públiku ninin.
“Bazeia ba Lei Orden Públika, bandu vendedór fa’an iha trotoár leten no iha estrada públiku ninin, maibé negosiante sira nafatin laiha konxiénsia hodi fa’an modo uza motorizada iha estrada ninin hodi hamosu engarrafamentu”, Teresa Pires informa iha Bairru Costa, ohin.
Tuir dekretu-lei númeru 33/2018, loron 27 Agostu, kona-ba Iiiene no Orden PPúblika bandu vendedór ambulante halo negósiu ka sirkula hodi fa’an sasán iha fatin públiku no besik repartisaun Estadu.
Dirijente ne’e salienta katak Jestaun Merkadu durante ne’e halo observasaun no halo jestaun hodi fó sai avizu ba vendedór labele fa’an iha trotoár leten no iha estrada públiku ninin, maibé vendedór sira nafatin fa’an.
Razaun sira fa’an iha estrada ninin iha merkadu Debos ho intesaun atu ema bele sosa lalais sira-nia modo no fa’an iha estrada ninin la’os fa’an sasán permanente, maibé provizóriu de’it.
Nune’e Jestaun Merkadu buka meiu hodi identifika fatin mamuk atu koloka vendedór sira-ne’e, maibé sira nafatin la aseita, tanba ema sosa modo la tama bá merkadu, maibé iha li’ur, tan ne’e halo vendedór sira fa’an iha estrada ninin iha tempu kalan.
Vendedór Víctor Saldanha esplika katak nia parte uza motorizada fa’an modo iha estrada ninin ne’e la permanente. “Ami la’ós vendedór permanente iha merkadu, maibé ami fa’an modo iha dader ho lorokraik tanba fa’an bazeia ba ami-nia produtu ne’ebé ami na’in prodús. Bainhira iha produtu ami fa’an, sé laiha ami la fa’an”, dehan.
Notísia relevante: Lixu akumula iha merkadu Debos tanba laiha pesoál limpeza
Jornalista: Celestina Teles
Editora: Maria Auxiliadora
