DILI, 24 outubru 2024 (TATOLI)—Prokuradória Jerál Repúblika (PJR), Komisaun Anti-Korrupsaun (CAC, siglá portugés), Provedoria Direitu Umanu no Justisa (PDHJ, siglá portugés), kinta ne’e, hala’o audénsia públika ba proposta Orsamentu Jerál Estadu (OJE) 2025 husi instituisaun ida-idak ba komisaun A trata asuntu Justisa no Konstituisionál iha Parlamentu Nasionál (PN).
“PJR nia proposta OJE ba 2025 ne’ebé ohin iha audiénsia aprezenta ho montante $4,203, 437 ne’e fahe ba kategória saláriu vensimentu $3,277,759, bens no serbisu $905, 678, kapitál menór rihun $40,” Prokuradór Jerál Repúlika (PJR), Alfonso Lopez, hateten ba jornalista sira hafoin ramata audiénsia iha PN.
Ba tinan oin, PJR prioriza programa asesu justisa ho sub-programa jestaun prosesu krime ho atividade ida.
Programa funsionamentu no dezenvolvimentu instituisionál ho sub-programa ida no atividade rua.
Durante audiénsia, PJR mós relata ezekusaun OJE 2024 ho montante $3,842,631 to’o 22 outubru 2024 ne’e atinje ona 67,22%.
CAC prevee $1,925,935
Komisáriu CAC, Rui Perreira, dehan ohin CAC mós mai aprezenta proposta OJE 2025 CAC nian ho montante $1,925,935 ne’ebé ba saláriu bensimentu $1,428,948, bens no serbisu $496,987.
Durante audiénsia, CAC aprezenta adisionál rihun $110-resin hodi finansia atividade serbisu CAC nian iha tinan oin iha rai-liur, nune’e aprezenta ba komisaun hodi hetan konsiderasaun.
Tuir dokumentu livru proposta OJE 2025 ba tinan tinan oin CAC iha programa asesu justisa ho sub-programa investigasaun kriminál ho atividade rua (2), sub-programa informasaun no seguransa ho atividade rua (2), sub-programa sensibilizasaun no promosaun valór anti-korrupsaun ho atividade tolu (3), sub-programa prevensaun krime korrupsaun ho atividade haat (4) .
Programa funsionamentu no dezenvolvimentu instituisionál ho sub-programa tolu (3) no atividade sia (9).
CAC relata ezekusaun OJE 2024 atinje 36% tanba lideransa CAC foin ba hala’o serbisu, nune’e hein katak to’o dezembru bele aumenta ezekusaun 60%.
Entretantu, PDHJ nia proposta OJE 2025 iha $2,139,368 hodi aloka ba saláriu vensimentu $1,402,463, bens no serbisu $ 696,905, kapitál menór rihun $40.
Tuir dokumentu livru OJE 2025 PDHJ ba tinan oin iha programa direitu umanu no boa-governasaun ho sub-programa serbisu advokásia iha lejislasaun no polítika públika ho atividade ida (1), sub-programa promove direitu umanu no boa-governasaun ho atividade haat (4), sub-programa prevensaun violasaun direitu umanu no boagovernasaun ho atividade rua (2), sub-programa rezolusaun konflitu ba violasaun direitu umanu no boagovernasaun ho atividade haat (4).
Programa funsionamentu no dezenvolvimentu instituisionál ho sub-programa tolu (3) no atividade 10.
Jornalista : Nelson de Sousa
Editór : Cancio Ximenes
