DILI, 16 novembru 2024 (TATOLI)–Prezidente Komisaun Nasionál Eleisaun (CNE), José Belo, garante Ema ho Defisiénsia (EhD) matan iha Timor-Leste sei uza braille hodi bele partisipa iha prosesu eleisaun hodi tuir vota.
Nia konsidera, preokupasaun sosiedade sivil, ema ho defisiénsia no estudante sira-nia preokupasaun rasionál, agora ne’e sira-nia partisipasaun iha eleisaun sente kategoria ema ho defisiénsia sira la sente direitu totál, tanba ema seluk mak lori sira ba vota.
“Entaun, nia labele transmite rasiu no ne’e konsege transmite, tanba ne’e liuhusi estudu hamutuk ho Servisu Tékniku Administrasaun Eleisaun no Programa Nasaun Unida ba Dezenvolvimentu, entaun iha ona lei ida ba ida ne’e iha Parlamentu Nasionál, atu Prezidente Repúblika promulga. Maibé la konsege momentu iha eleisaun ne’ebá tama ona ba faze eleisaun,” Prezidente CNE, José Belo, ba jornalista sira nakait ho atividade edukasaun sivika ba estudante sira ho tema “Politika Desentralizasaun Timor Leste, Promove potensial Sira espesifiku ba program Dezenvolvimentu Lokál, iha salaun CNE, Colmera.
Nia esplika, lei kona-ba direitu ho ema defisiénsia ne’e iha ona Parlamentu Nasionál atu haree fila-fali no bankada hotu-hotu iha Parlamentu Nasionál konkorda katak di’ak-liu uza brailler ka sistema ida atu fasilita sira.
“Tanba, ema ho defisiénsia iha Timor-Leste dadus hatudu iha de’it rihun $14. Ita gasta osan orsamentu ba sira-ne’ebé ema ho defisiénsia matan ne’e gasta de’it osan rihun $15. Osan rihun $15 ne’e kiik-liu, entaun ha’u hanoin deputadu sira konsidera ida-ne’e importante, ne’ebé solusaun iha tiha ona. Lei ne’e iha ona, hein Prezidente Repúblika promulga. Fixu katak iha eleisaun 2027 iha eleisaun Prezidensiál no iha 2028 iha eleisaun Parlamentar,” nia dehan.
Prezidente CNE ne’e dehan, agora eleisaun munisipál depende ba iha Governu sentrál halo no sei la halo ba munisipiu sira hotu maibé fazeadamente.
Entaun, Prezidente Autoridade munisipál sira agora ne’e hanesan apelu importante iha faze tranzisaun nia laran.
“Hatudu kapasidade oinsá organiza, se prepara ona, ha’u hanoin iha ona eleisaun no ita sei ko’alia kona-ba partisipasaun ema ho defisiénsia sira-nian,” nia hateten.
Husu kona-ba serteza ba eleisaun sira mai, Ema ho Defisiénsia (EhD) bele uza brailler ba tuir votasaun hodi garante sira segredu votu, nia hatán, garantia tanba la iha ema ida bankada objesaun, signifika eleisaun importante no husi sira-nia votu mak halo ema sai deputadu, membru Governu no Prezidente Repúblika.
“Ha’u hanoin laiha ema ida iha objesaun,” nia hateten.
Jornalista : Jesuína Xavier
Editór : Cancio Ximenes
