DILI, 18 novembru 2024 (TATOLI) – Institutu Politékniku Betano (IPB) propoin estudante 400 ba tinan letivu 2025.
“Ita-nia anu letivu 2025 ne’e ita presiza estudante na’in-400. IPB iha fakuldade rua mak Fakuldade Produsaun Animál no Fakuldade Kontrusaun Sívil. Kada fakuldade presiza ema na’in-200. Rekrutamentu ne’e ita hahú iha janeiru no prosesu la’ós IPB mesak maibé hamutuk ho MESSK inklui ho Universidade Nasionál Timor-Lorosa’e (UNTL)”, Prezidente IPB, Acácio Cardoso Amaral dehan ba TATOLI, iha Hotel Timor, Colmera, Dili, segunda ne’e.
Nune’e UNTL hahú disemina ona informasaun kona-ba asesu iha ensinu superiór públiku, dezde inísiu fulan-setembru to’o ezame finál, hanesan atividade ne’ebé akontese molok tama iha tinan letivu foun.
Diretór Diresaun Nasionál Ensinu Superiór iha MESSK, Higino Alves, husu ba diretór no reprezentante kada eskola inklui autoriedade lokál sira iha munisípiu Ermera to’o suku sira atu hatutan informasaun ho didi’ak ba joven no estudante finalista sira.
“Ha’u husu ba Diretór eskola sira iha ne’e, reprezentante sira no autoriedade lokál atu kontinua hatutan informasaun ne’e ho didi’ak ba joven no finalista sira ne’ebé mak ramata eskola no hakarak mai kontinua iha ensinu superiór públiku hanesan UNTL no IPB,” Diretór ne’e fó sai.
Kona-ba graduasaun IPB ba tinan ida-ne’e, nia dehan IPB fó ona graduasaun ba ema atus ida iha fulan-outubru liubá.
Nune’e mós, Reitór DIT, Salustiano dos Reis Piedade, dehan, kada tinan DIT simu estudante foun hamutuk 1.200.
“Ami tinan-tinan simu estudante foun barak liu 1,200. Ami la simu liu ida-ne’e dala ruma ami hetan tan bolsa husi Fundu Kapitál Dezenvolvimentu Umanu mak sa’e ba 1.400, ami limite simu estudante ne’e tanba ami-nia fasilidade sira ne’e, tanba ami la’ós simu ema mai para tuur rungu ranga, la iha fatin ka kondisaun hodi aprende ne’ebé ami la simu estudante liu ami nia target (alvu) ne’ebé mak iha. Ami simu tuir ami-nia fasilidade ne’ebé mak iha”, nia dehan.
Reitór estabelesimentu ensinu privadu ne’e dehan, inskrisaun ba estudante foun ne’e agora hahú ona ne’e ba sira ne’ebé mak ramata sira-nia estudu iha tinan kotuk nian no fó oportunidade ba sira ne’ebé mak pasa iha tinan ne’e.
“Ami iha fakuldade haat (4), hanesan fakuldade engineering science, civil engineering, mechanic engineering no computer science, fakuldade Turizmu no hospitality, no iha kursu foun ne’ebé mak ami hetan lisensa husi MESSK iha tolu no ami iha departamentu 11. Totál estudante ativu hamutuk kuaze rihun lima,” nia relata.
Notísia relevante:MESSK loke inskrisaun ba finalista sira iha Oé-Cusse asesu ba UNTL-IPB
Jornalista : Osória Marques
Editór: Rafael Ximenes de A. Belo
