OÉ-CUSSE, 22 Novembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) prevee rihun $200 ba komemorasaun Loron Proklamasaun Independénsia ba da-49, iha 28 Novembru.
“Ita-nia Prezidente Autoridade aprova ona rihun $200 ba eventu ne’e, la inklui osan husi nasionál”, Sekretáriu Rejionál ba Asuntu Administrasaun, André Lao, informa iha otél Ambeno.
Prezidente Komisaun Organizadora husi RAEOA ne’e afirma katak Oé-Cusse nia preparasaun daudaun koordena no ajusta atividade hothotu ho Prezidente Komisaun Organizadora husi nasionál, atuál Ministru Administrasaun Estatál, Tomás Cabral.
“Entaun, iha RAEOA ne’e ajusta no koordena de’it serbisu ho Governu sentrál hodi fó susesu ba eventu Loron Proklamasaun Independensia ba da-49”, nia reitera.
Sekretáriu rejionál ne’e esplika katak autoridade aloka verba ne’e ba atividade prinsipál hotu mak prepara fatin ba isár bandeira iha kampu 01 de Maio Palaban no iha buat balun ne’ebé seidauk di’ak, husi nasionál ajusta no halo konstrusaun hodi tama iha kategoria tuir regra parada nian.
“Osan aloka ba ne’e fahe ba seksaun isár bandeira, korpu isár bandeira, movimentu komunidade husi baze, hamoos fatin, bee-moos, liña eletrisidade, [ba atividade] halai kuda, animasaun no atividade sira seluk. Aban hahú abertura feira iha monumentu Lifau”, nia dehan.
Notísia relevante: Palku ba komemorasaun 28 Novembru iha Oé-Cusse atinje 75%
André Lao adianta katak atividade corrida cavalo ne’e realiza, entre loron 30 Novembru no 07 Dezembru, depoizde isár bandeira, ne’ebé nia partisipante sira mai husi nasaun vizinha ka husi Nusa Tenggara Timur no munisípiu sira-seluk.
Jornalista: Abílio Elo Nini
Editora: Maria Auxiliadora
