DILI, 27 novembru 2024 (TATOLI)–Antigu Primeiru-Ministru, Taur Matan Ruak, husu ba ukun-na’in sira atu tau interese nasaun aas liu iha interese individu no grupu, hodi bele lori estabilidade no dame iha Timor-Leste.
Jenerál Taur Matan Ruak hanoin hikas ba iha tempu 1975 to’o mai iha ohin loron ne’e, hamosu istória ida riku ne’ebé iha buat di’ak no iha mós buat aat, iha sofrimentu barak mak bele manán ukun rasik aan to’o ohin loron ne’e.
“Ha’u-nia mensajen ba populasaun tomak liuliu ba ukun-na’in sira. Husu ba Prezidente Repúblika, Parlamentu Nasionál, Primeiru-Ministru, Tribunál Rekursu, governante hotu iha Timor laran tomak to’o xefe aldeia, fatin ida sira tuur ne’e ema rihun ba rihun nia terus, sakrifisiu no sofrimentu ne’e mak to’o ohin tuur iha sira-nia fatin. Tanba ne’e, kuidadu buat ne’ebé sira fó hela. Haluha ita-nia aan,hodi tau matan ba ema barak no tau matan ba ita-nia nasaun. Interrese iha tolu mak interrese individuál, interrese grupu no interrese nasaun. Ida-idak tau nia fatin iha ne’ebé de’it, interrese nasaun nian ne’e iha leten. Nia labele iha fali interrese grupu no individuál nia okos,” Jenerál Taur hato’o mensajen ne’e nakait ho komemorasaun loron Proklamasaun independénsia unilaterál ba da-49 (28 novembru 1975-29 novembru 2024), bainhira halo somumutu ho jornalista sira ho tema “Reflesaun loron Proklamasaun Independensia Timor-Leste, 28 Novembru-Pasadu, prezente no futuru”, iha ninia kna’ar fatin, Faról, tersa ne’e.
Aleinde ne’e, nia hato’o mensajen ba povu doben Timor-Leste tomak atu hadomi rai lulik ida-ne’e, tanba rai ida-ne’e hamriik hanesan nasaun soberania iha nasaun seluk nie leet, nia folin mak sosa ho raan no ruin.
“Ha’u-nia mensajen ba povu Timor tomak mak ne’e, hadomi ita-nia rain, hadomi ita-nia povu. Tanba, (ukun rasik aan) ema la fó ba ita iha bandeza, ita sosa hodi raan no hodi terus mak hetan. Buat ne’ebé ita lori osan mak sosa, ita nunka soe, nunka halo aat, ita kuidadu di’ak. Tanbasá mak ita lori ema mak sosa, ita labele kuidadu,” Taur apela.
Tina ida-ne’e, Taur dehan, nu’udar tinan reflesaun hodi hanoin povu nia sofrimentu no hateke ba loron aban katak ema ida-idak fiar hodi define ema ida-nia aan hodi hametin estabilidade no pás, no mós beinestar povu nian ne’e sei hetan loron ida ba loron ida seluk, lori tempu naruk, serbisu makaas mak sei manán no parabéns ba povu Timor-Leste.
Antigu Primeiru-Ministru ne’e mós fó nia solidariedade ba vítima funu no eroi sira-ne’ebé mate hodi husik hela sira-nia família atu liberta sira nasaun [Timor-leste] to’o ukun rasik aan.
“Ha’u mos fó ha’u nia solidariedade ba família hotu ne’ebé iha tasi feto no tasi mane, iha rai ulun no rai ikun ne’ebé nia familia lakon no mate ba nasaun ida-ne’e,” nia dehan.
Jornalista : Jesuína Xavier
Editór : Cancio Ximenes
