DILI, 21 dezembru 2024 (TATOLI) – Diretór Jerál Servisu Rejistu Notariadu, Agostinho Gonçalves Vieira, hateten tékniku husi Diresaun Jerál Servisu Rejistu Notariadu halo ona manutensaun ba mákina imprensaun Pasaporte no mákina ia-ne’e hahú funsiona normál, hodi fó atendimentu ba públiku.
¨Sim, foin daudaun atendimentu Pasaporte lalao iha loron hirak nia laran tanba hanesan eselénsia Ministru Justisa koalia ona ba midia tanba ekipamentu ba imprensaun Pasaporte Sisco mak aat. Maibé depoizde ida-ne’e ekipa tékniku esforsu hodi halo kedan manutensaun. Sira instala tiha ona, ohin ita boot sira haree atendimentu Pasaporte la’o normál fila fali hanesan baibain¨, Agostinho Gonçalves, dehan ba jornalista sira iha nia knaar fatin Colmera, sesta ne’e.
Nia dehan, Governu liuhusi Ministériu Justisa halo ona kontaktu ho Empreza Thales atu halo akizisaun ba ekipamentu Sisco, tanba empreza Thales mak nudar empreza ne’ebé mak faan ekipamentu ba impresaun Pasaporte.
¨Ita sei halo akizisaun ba ekipamentu ida-ne’e. Espera ekipamentu ida-ne’e bele rezolve lalais ekipamentu ne’e. Tanba ida agora halo instalasaun hodi halo atendimentu ba públiku ne’e ekipamentu Sisco husi Aileu mak mai instala iha ne’e hodi substitui Sisco Notariadu Nasionál¨, nia konklui
Notísia relevante : Mákina imprensaun Pasaporte ida mak avaria
Jornalista: Natalino Costa
Editór : Zezito Silva
