DILI, 19 dezembru 2024 (TATOLI) – Ministru Justisa, Sergio Hornai, hateten mákina imprensaun Pasaporte ne’ebé mak ho naran Sisco avaria ona, atualmente, emisaun ba pasaporte, provizóriu, paradu desde tersa (17/12) foin daudaun.
Ministru dehan, Ministru Justisa orienta ona tékniku sira atu ba foti fali Sisco iha Servisu Rejistu Notariadu Munisípiu Aileu hodi mai monta fali Servisu Rejistu Notariadu atu bele fó atendimentu ba komunidade sira ne’ebé mak atu halo Pasaporte.
¨Politikamente ha’u fó ona orientasaun ba servisu tékniku, servisu rejistu Notariadu iha Diretór Pasaporte nian para bele urjentemente haree ba situasaun sira ne’e¨, Sergio Hornai hateten ba jornalista sira iha nia knaar fatin Caicoli, kinta, ohin.
Hornai dehan, tékniku husi Servisu Notariadu Nasionál foti ona ekipamentu Sisco iha Aileu hodi instala fali iha Notariadu Nasionál.
¨Ha’u komunika ona ho empreza Thales hamutuk ho tékniku Notariadu atu haree ida-ne’e oinsa mak konfigura sistema ne’e atu ita halo fali atendimentu normál ba Pasaporte¨, nia adianta.
Governante ne’e dehan, hanesan membru Governu ne’ebé responsabiliza, buka esforsu hotu para bele fó asisténsia ida ne’ebé ho kualidade.
Nia dehan seidauk simu relatóriu finál kona-ba kazu saida mak halo mákina imprensaun Pasaporte bele avaria.
¨Ha’u labele julga katak mákina imprensaun Pasaporte ne’e tanba saida mak avaria. Ida-nee bele mai ho sirkustánsia eletrisidade ne’ebé mate lakan ou iha mós sirkustánsia seluk¨, nia konklui.
Tuir dadus ne’ebé iha, mákina imprensaun iha servisu notariadu hamutuk tolu maibé ida mak avaria
Jornalista: Natalino Costa
Editór : Zezito Silva
