DILI, 10 janeiru 2024 (TATOLI) – Durante udan monu rai, Servisu Saúde Munisípiu Ermera, hahú rejista ona kazu dengue ne’ebé afeta ba labarik sira hamutuk 27.
“Udan monu rai, hahú iha novembru, entaun hahú husi ne’eba mai to’o agora, ita rejista ona kazu dengue hamutuk 27 ne’ebé afeta ba ema boot sira, maioria ba labarik idade 14 mai kraik”, Diretór Servisu Saúde Munisípiu Ermera, António de Deus, informa ba TATOLI via telefone, ohin.
Deus afirma, kazu sira ne’e la halo referénsia maibé halo de’it observasaun iha servisu saúde internamentu Glenu, depois sira halo rekoperasaun hodi fila ba uma.
“Pasiente sira ne’ebé mak baixa ne’e laos grave, maibé observa de’it depois rekopera ita haruka sira fila ba uma”, nia relata.
Kona-ba estoke ai-moruk, Servisu Saúde Munisípiu Ermera, nafatin sufisiente hodi atende ba pasiente sira ne’ebé mak mai halo tratamentu saúde.
“Ai-moruk, ita nafatin iha hodi fó tratamentu, entaun ami halo intervensaun iha buat tolu mak importante mak halo abatizasaun ba uma kain sira, daruak mak ita reforsa nafatin promosaun saúde, datoluk mak ita halo fomigasaun ba área sira ne’ebé mak ita identifika moras dengue sira”, nia haktuir.
Nia subliña, iha meadu fulan-Janeiru, Servisu Saúde Munisípiu Ermera rejista ona kazu dengue hamutuk 12.
Moras ne’ebé mak aas iha Servisu Saúde Ermera, mak Infesaun Vias Respiratória Aguda hamutuk dezde 2024 hamutuk 60, tuir mak diarea, dengue no moras kulit.
Jornalista : Felicidade Ximenes
Editór : Zezito Silva
