DILI, 17 janeiru 2025 (TATOLI)—Tribunál Judisiál Primeira Instánsia Dili (TJPID), sesta ne’e, liuhusi juíz prosesu Ivan Suritai hatún leitura akordaun deside aplika pena prizaun efetivu tinan sanulu (10) ba arguidu ho inisiál RML, ne’ebé hadau telefone iha Praia dos Coqueiros, tinan kotuk, hodi rezulta Niusia Fangidai Soares Jong lakon vida no nia inan hetan kanek grave.
Tribunál aplika pena tinan 10 ba arguidu RML tanba Tribunál haree katak durante prosesu julgamentu ba kazu ne’e faktu sira provadu katak krime violénsia tuir fali subtrasaun ne’ebé previstu iha artigu 254 husi Kódigu Penál Timor-Leste.
Iha sala julgamentu laran, juíz prosesu Ivan Suritai deklara katak prosesu refere antes ne’e iha julgamentu Ministériu Públiku akuza arguidu RML ho krime roubu ne’ebé previstu iha artigu 253. Maibé, rona tiha deklarasaun husi arguidu no ofendidu sira, Tribunál koletivu ida-ne’e halo fali alterasaun kualifikasaun jurídika husi krime roubu bá iha krime violénsia, tuir fali subtrasaun ne’ebé previstu iha artigu 254 husi Kódigu Penál Timor-Leste.
“Provadu katak momentu ne’ebá arguidu hamutuk ho nia kolega ida no arguidu rasik mak lori motór. Provadu mós katak arguidu maka tula nia kolega hodi ikusmai foti lezada nia telemóvel. Lezada tenta duni tuir más arguidu nia kolega soe ai ba kona motór, halo lezada la kontrola an nune’e ikusmai soke ho motór rezulta lezada nia oan mate no lezada hetan kanek todan,” Juíz Ivan deklara bainhira lee sai akordaun iha sala julgamentu Tribunál Judisiál Primeira Instánsia Dili, Caicoli.
Notísia relevante: Tribunál julga kazu hadau telefone rezulta feto ida kanek no nia oan fila
Ivan hateten durante prosesu julgamentu ba kazu ne’e, arguidu nega ba faktu sira ne’ebé Ministériu Públiku akuza ba nia katak momentu ne’ebá arguidu laiha intensaun tula nia kolega hodi ba na’ok no arguidu mós nega kona-ba arguidu nia kolega JP foti telemóvel. To’o ona iha fatin ida maka argudu sira rona katak labarik ida hetan kanek halo arguidu ta’uk hodi bá subar iha nia kolega nia uma.
“Tribunál haree katak maski arguidu nega faktu, maibé bazeia ba deklarasaun lezada ne’ebé hanesan matebian nia inan, deklara katak momentu ne’ebá arguidu maka kondús motór. Bainhira lezada hakilar tuir arguidu atu para maibé arguidu kondús motór kontinua halai ho velosidade maka’as,” nia haktuir.
Tanba ne’e, Tribunál haree katak arguidu nia deklarasaun iha Ministériu Públiku kontradis ho arguidu nia deklarasaun iha Tribunál. Nune’e, ikusmai Tribunál tetu katak arguidu ho nia kolega iha duni intensaun atu na’ok telemóvel no provadu bá iha krime ne’ebé iha. Tanba ne’e, Tribunál deside aplika pena prizaun tinan 10 ba arguidu.
Juíz Ivan hateten katak Tribunál mós husu ba arguidu kuandu la aseita ho desizaun ne’e bele liuhusi nia defeza atu halo rekursu hodi kontra desizaun Tribunál Judisiál Primeira Instánsia Dili.
Iha fatin hanesan, defeza arguidu nian, Manuel Amaral hateten nia parte seidauk simu akordaun husi Tribunál ba pena ne’ebé aplika ba arguidu.
“Ha’u sei haree hodi halo rekursu ba pena ne’ebé Tribunál aplika ba ha’u-nia asistidu.Tanba iha ha’u-nia alegasaun ha’u husu absolvisaun, tanba se Tribunál kondena ho pena ne’ebé boot, entaun ha’u sei haree atu halo rekursu hasoru desizaun ne’e,” nia esklarese.
Jornalista: Natalino Costa
Editór: Xisto Freitas da Piedade
