DILI, 11 dezembru 2024 (TATOLI) – Tribunál Judisiál Primeira Instánsia Dili (TJPID) kuarta (11/12), ohin, hahú halo julgamentu ba kazu hadau telefone iha Praia dos Coqueiros ne’ebé akontese iha 21 maiu 2024 hodi rezulta feto ida kanek grave no nia oan mate.
Iha sala julgamentu, arguidu RMd konfensa ba Tribunál katak momentu ne’e arguidu ho nia kolega kondús motorizada Mio Beat ida no tula malu husi Kampun Alor atu ba Cristo-Rei, maibé derepente sira haree katak feto ida ho nia oan tula malu mak foin duni tuir kedan.
¨Ami momentu ne’e tula malu husi Kampun Alor atu ba Cristo-Rei, maibé haree fali mana ho nia oan ho motor halai liu mós husi ami nia oin. Entaun ami dehan ba malu katak ita-nia tarjetu mak ne’e. Entaun ami duni tuir kedan mana ho nia oan¨, arguidu RMd deklara ba Tribunál Judisiál Primira Instánsia Dili kuarta ne’e.
Nia deklara tan katak momentu ne’e sira duni tuir no konsege foti tiha ofendida Juliana Elizabeth nia telefone no ofendida Elizabeth duni tuir tenta atu foti fali maibé tanba hakfodak entaun ofendida monu.
¨Momentu ne’e ami konsege hadau duni nia telefone no nia duni tuir ami rua to’o mai loja Seara Pantai Kelapa ne’e mak nia monu no ami rua halai liu tiha¨, nia adianta.
Nune’e mak Ofendida Juliana Elizabeth fó nia depoimentu ba Tribunál katak momentu ne’e nia foin fila husi treinu basket iha eskola China, nia ba foti nia oan atu fila fali ba sira uma Pantai Kelapa.
¨To’o tiha área Soto Kampung Alor nian, derepente ha’u haree iha ema nain-rua ho motor halai rabat tiha ha’u nia sorin, hadau telefone husi ha’u no momentu sira hadau duni ha’u nia telefone, nune’e ha’u duni tuir kedan atu foti ha’u nia telefone. Maibé momentu ha’u lakon kontrolu hodi soke moru ida besik loja Seara Pantai Kelapa no ha’u monu ba la sadar¨, konta nia.
Hafoin rona tiha depoimentu husi ofendida Elizabeth, Tribunál liuhusi Juiz Ivan Suritai hasai mandadu no konstitui JP nia estatutu, antes ne’e hanesan sasin ba arguidu tanba ho razaun katak momentu ne’e JP hamutuk arguidu RMd mak halo asaun rouba hodi foti ofendida Juliana Elizabeth nune’e rezulta ofendida hetan kanek grave no nia oan mate.
Entratantu, tuir akuzasaun Ministériu Públiku nia katak iha loron 21 fulan-Maiu tinan 2024 por volta 19h00 kalan ofendida Juliana Elizabeth Fangidai Soares fila husi treinu basket iha eskola China hodi ba foti nia oan vítima Niusia Faidai Soares Jong iha Kuluhun atu fila ba iha sira-nia hela fatin Praia dos Coqueiros Dili.
Ofendida kondús motorizada marka Mio Beat ho sapa matrikula 05299 husi diresaun Kuluhun atu ba fali Praia dos Coqueiros, too iha Kampun Alor, arguidu RMd no JP ne’ebé kaer ai tonka kondús motorizada ho marka Mio Beat tuir kedan ofendida nia kotuk.
Arguidu RMd kondús motorizada besik ba ofendida hodi liu husi sorin karuk hodi arugidu JP foti telemovel marka Oppo husi nia tilun parte karuk hodi kontinua halai liu.
Ofendida tenta duni tuir arguidu ho nia kolega, maibé arguidu jp lori ain tonka tuda ba ofendida nia motorizada hodi nia mós lakon kontrola soke trotoar monu ba rai hodi rezulta vítima hetan kanek todan no nia oan liu loron rua mate iha ospitál .
Konsekuénsia husi arguidu sira-nia asaun halo vítima Niusia mate no vítima Juliana hetan kanek grave.
Arguidu sira hatene bainhira hadau ema nia telemovel no halo violénsia ne’e kontra ema nia vontade maibé arguidu sira halo nafatin saida mak sira nia hakarak.
Arguidu halo krime ho livre, deliberada, konsentimentu no hatene katak hahalok ne’e proibidu no hetan pena tuir lei. Tanba ne’e konsidera arguidu hanesan ko-autor materiál ba krime rouba ne’ebé previstu iha artigu 253 númeru 3 no 4 husi Kodigu Penál Timor-Leste.
Ho nune’e, Tribunál koletivu marka fila fali data julgamentu ba kazu ne’e ba loron 17 fulan-dezembru tuku rua hodi kontinua rona arguidu nia deklarasaun.
Audiénsia julamentu ne’e prezide husi Juiz koletivu Ivan Suritai Arjentino Nunes no Julmira Auxiladora, Ministériu Públiku reprezentante husi Prokuradór Renato Bere Nahac no arguidu hetan asisténsia legál husi Defensór Públiku Manuel Amaral.
Jornalista: Natalino Costa
Editór : Zezito Silva
