DILI, 23 Janeiru 2025 (TATOLI) – Antigu profesór kontratadu 2023 hamutuk 251 mak tama ona ba bolsa kandidatu no atualmente hanorin ona estudante sira iha territóriu.
“Ami hamutuk 1.499 no iha kolega 251 mak deside tuir teste bolsa kandidatu no liu hotu ona no sira agora hanorin hela no seluk mós voluntáriu hela iha eskola privadu sira, maibé ha’u ladún hatene sira-nia númeru fiksu no restante ne’e ami sei mantein hela hodi hein solusaun husi Ministériu Edukasaun ba ami-nia problema ne’e “, Portavós eis profesór kontratadu, Agostihno Pinto hatete, iha Vila-Verde, kinta ne’e.
Pinto hatutan, antigu profesór kontratadu maioria deside lakohi tuir teste bolsa kandidatu tanba sira nu’udár edukadór ne’ebé serví ona ba Estadu ida-ne’e ho voluntáriu liu ona tinan 20, durante tinan 20 Estadu rekoñese no valoriza hodi hasa’e ona estatutu profesór voluntáriu ba ajente administrasaun públika tuir lei No 5/2009 /15 fulan Jullu, iha ne’ebé hateten katak funsionáriu permanente no ajente administrasaun bainhira mate ona foin bele para.
“tanba ida-ne’e mak ami nafatin hein no ezije ba Ministériu Edukasaun atu solusiona ami-nia problema ida-ne’e. Tanba ami kontribui ba tinan naruk ona no Estadu mós rekoñese ona ami no valoriza ona hodi hasa’e ona estatutu profesór voluntáriu ba ajente administrasaun públika”, nia esplika.
Nia dehan, Ministériu Edukasaun fó opsaun ba sira atu tuir teste espesiál la inklui ho ema seluk maibé sira deside rezeita opsaun referidu tanba la iha konkordánsia.
“Ami hakarak tenke iha konkordánsia entre ami ho Ministériu Edukasaun, nune’e ami labele lakon ami-nia direitu, tanba teste espesiál ne’e mós sei iha manán no lakon”, nia konklui.
Notísia relevante :ME husu prefesór rekrutadu bolsa kandidatu informa bainhira saláriu-subsídiu seidauk tama
Jornalista : Osória Marques
Editór : Zezito Silva
