DILI, 28 janeiru 2025 (TATOLI)--Deputada Bankada Governu husi Congresso Nacional da Reconstrução Timorense (CNRT), Cedelízia Farria dos Santos, husu ba Governu atu tau atensaun hadi’a estrada husi Gleno ba Letefoho no Ermera Antiga.
“Hakarak levanta kestaun estrada iha munisípiu Ermera, ne’ebé kada loron piór liután, notísia ne’ebé ita akompaña iha estrada Ermera husi Gleno ba Letefoho, Atsabe no mós estrada Hatulia kontinua ho kondisaun ladi’ak. Kolega Deputadu sira seluk kontinua levanta kestaun ne’e iha uma fukun ne’e no akompaña mós husi mídia, Governu halo ona konkursu ba estrada refere, agora ita iha ona tinan 2025, Vise-Ministru (asuntu Parlamentár) pergunta mak ne’e bainhira mak projetu ne’e hahú no implementa,” Deputada levanta liuhusi reuniaun plenária iha Parlamentu Nasionál (PN), tersa ne’e.
Nia husu, Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEAD, I.P) atu halo intervensaun urjente normaliza estrada Hatulia.
Aleinde ne’e, Deputada bankada opozisaun FRETILIN, Lídia Norberta, levanta preokupasaun populasaun husi suku Funar Sasahi, postu Laclubar, munisípiu Manatuto kona-ba kondisaun estrada, liu-liu iha tempu udan susar tebes.
“Levanta mós abitante iha suku Asumanu, iha sábadu semana kotuk, ha’u to’o iha suku ne’ebá, sira mós enfrenta kondisaun estrada ladi’ak,” nia preokupa.
Reprezentante Governu liuhusi Vise Ministru ba asuntu Parlamentár, Adérito Hugo da Costa, rejista preokupasaun kona-ba normalizasaun no reabilitasaun estrada sei envia ba ministériu tutela hodi tau atensaun.
Notísia relevante : https://tatoli.tl/2024/03/22/mop-estrada-dirasaun-gleno-letefoho-ermera-lama-iha-hela-prosesu-dezenu/
Antes ne’e, Xefe suku Humboe, postu administrativu Ermera Vila, munisípiu Ermera, Francisco Babo Salsinha, husu Governu tau atensaun hodi hadi’a estrada diresaun Gleno bá Letefoho no Ermera Antiga.
“Foin lalais ami rona iha fulan-marsu ne’e halo lansamentu ona, ne’ebé komunidade kontente, nune’e kontinua husu Governu atu aselera ninia konstrusaun, tanba kondisaun estrada atuál tinan barak ona povu halerik ho estrada ne’ebé ho kondisaun ladi’ak,” Autoridade lokál ne’e hato’o iha sede suku Humboe, iha Ermera, foin lalais ne’e.
Nia haktuir, parte Ministériu Obra Públika (MOP) nasionál no munisípiu foin lalais tun ona iha suku hodi halo levantamentu ba komunidade afetadu ba konstrusaun no alargamentu estrada.
“Bazeia ba lista ne’ebé ami hetan husi MOP, ami prepara loke konta bankária atu selu indemnizasaun Humboe iha afetadu iha 74, entaun sira ne’ebé konklui ona dokumentu no loke konta bánkaria foin daudaun ami entrega ona ba MOP hodi trata indemnizasaun husi Governu,” nia tenik.
Levantamentu ne’e haree mós ba komunidade sira-nia plantasaun hanesan kafé no ai-teka hodi hetan mós indemnizasaun.
“Komunidade hotu koopera no esperansa mak Governu ida-ne’e bele hadi’a estrada, tanba tinan barak povu ne’e halerik ba kondisaun estrada,’’ Autoridade suku katak.
Tuir observasaun jornalista iha terrenu, nota katak estrada husi Gleno ba Letefoho no Ermera Antiga daudaun iha tempu udan ho kondisaun grave ne’ebé difikulta tebes movimentu transporte públiku.
Jornalista : Nelson de Sousa
Editora : Julia Chatarina
