DILI, 31 janeiru 2025 (TATOLI)—Prezidente Federasaun Atletizmu Timor-Leste (FATL) Afrânio Amaral hateten, tuir plaun federasaun atletizmu sei realiza kampionatu nasionál ba atleta atletizmu sira iha fulan-juñu tinan 2025.
“Kampionatu nasionál ne’e ita tenke halo kada tinan, ida ne’e tuir lei federasaun internasionál atletizmu nian. Se ita la halo mak fó impaktu ba ita-nia atleta sira atu ba tuir kompetisaun iha rai-liur. Federasaun planu ona sei hala’o kampionatu nasionál iha fulan juñu,” Afrânio hateten ba Agência TATOLI iha Jinaziu Dili, sesta ne’e.
Nia dehan, kampionatu nasionál hanesan meiu ida atu buka fini ba atleta sira-ne’ebé iha prestasaun di’ak atu ba kompete iha eventu internasionál sira iha rai-li’ur.
“Kampionatu nasionál ne’e ita halo atu buka mós fini ba atleta sira. Lusihusi eventu ne’e mak iha atleta sira-ne’ebé kualidade di’ak ita selesiona kedan tama ba atleta selesaun nasionál, nune’e sira bele ba kompete iha eventu internasionál sira hanesan jogu Olímpiku, SEA Games, Asian Games no seluk tan,” nia dehan.
Kampionatu nasionál ne’ebé sei realiza iha fulan-juñu ne’e atleta sira sei mai husi Munisípiu hotu no asosiasaun sira kada munisípiu ne’ebé iha ona.
“Ita halo ona proposta atu husu orsamentu ba Governu, ita prepara proposta rihun $30 tanba ita halo atividade ne’e ba númeru ne’ebé boot. Se Governu aprova duni rihun $30 ne’e mak ita sei hala’o eventu ba seniór no junior. Ita haree kada tinan sira liu ona ne’e, ita hetan apoiu husi Governu rihun $17 mai kraik, entaun ita labele halo atividade ne’ebé ho númeru boot,” nia hateten.
Nia hatutan, kampionatu nasionál ba atletizmu sei realiza iha Estádiu Munisipál Dili tanba iha Timor-Leste kondisaun ba atletizmu seidauk iha kondisaun ne’ebé sufisiente.
Tuir planu ne’ebé iha, atleta ne’ebé atu partisipa iha kampionatu nasionál ne’e hamutuk 250 sei mai husi munisípiu hotu iha Timor laran tomak.
Husi númeru ne’e, iha atleta ne’ebé prestasaun di’ak ne’e automatikamente federaaun atletizmu sei hili hodi sai hanesan atleta selesaun nasionál, atu prepara ba eventu internasionál sira.
Jornalista : Hortencio Sanchez
Editór : Cancio Ximenes
