DILI, 04 fevereiru 2025 (TATOLI)–Prezidente Komisaun ba jogu Tasa Avo 2025, Feliciano Ximenes, informa tasa Avo Nana tinan ida-ne’e sei realiza iha fulan-marsu ho objetivu atu promove klube lokál husi munisípiu.
“Tasa Avo Nana tinan 2025 ita hahú ona halo preparasaun, loron kuarta (05 fevereiru), ita hahú ona rejistu ba klube sira-ne’ebé hakarak partisipa. Ita fó liu oportunidade ba klube sira husi Munisípiu. Ita fó oportunidade ba sira atu nune’e bele promove sira-nia klube no sira-nia jogadór,” Feliciano Ximenes hateten ba Agência TATOLI iha Kuartél Unidade Espesiál Polísia (UEP), Bairro-Pite, tersa ne’e.
Nia dehan, iha tinan sira ba kotuk realiza jogu ne’e iha klube 32 mak partisipa maibé ba tinan ida-ne’e (2025) ne’e komisaun hakarak fó oportunidade ba klube fureból iha Timor-Leste liuliu klube sira-ne’ebé eziste iha munisípiu.
“Komesa aban, ita loke ona inskrisaun ba klube sira no ita sei taka iha 30 fevereiru 2025. Jogu sei jogu hala’o iha loron 03 fulan-marsu tinan 2025-loron nasionál veteranu nian no sei ramata iha fulan-juñu—iha loos Primeiru-Ministru Kay Rala Xanana Gusmão nia aniversáriu,” nia dehan.
Nia hatutan, kompetisaun taza Avo Nana 2025 ne’e sei loke ba kategoria rua mak hanesan futeból mane no futeból feto.
“Agora kampu mak sai problema ba ami atu realiza jogu tanba ita hatene Estádiu Munisipál Dili ita prepara ba jogu CPLP nian, maibé ami sei tenta nafatin Ministeriu Juventude Desportu Arte no Kultura (MJDAK) atu deside Estádiu Dili ita halo ba jogu abertura de’it. Bainhira finál mak ita hala’o fali iha Estádiu Dili, jogu seluk ita bele buka kampu seluk hodi hala’o jogu,” nia hateten.
Jogu ne’e la’o ho premiu ba manán-na’in sira hahú husi primeiru lugar to’o kuartu lugar, mellor markadór, mellor jogadór, mellor guarda rede no mellor klube ne’ebé hatudu jogu ho dixiplina nakpni ho ekipa servisu ne’ebé sólidu.
Premiu ba manán-na’in mane primeiru lugar sei simu $10.000, segundu lugar $6,000, terseiru lugar $4,000 no kuartu lugar $2,000. Enkuantu ba feto primeiru lugar $5,000, segunda lugar $3,000, terseiru lugar $2,000 no kuartu lugar $1,000.
Entretantu kona-ba jogu ne’e komisaun sei buka meiu hela atu husu apoiu husi patrosinadór sira iha Timor-Leste no husi apoiu husi Governu Konstitusionál da-sia (IX).
Notísia Relevante: Kalbuady hala’o abertura Tasa Avo Nana iha Covalima
Jornalista : Hortencio Sanchez
Editór : Cancio Ximenes