BAUCAU, 05 fevereiru 2025 (TATOLI)—Komandu Polísia Nasionál Timor-Leste (PNTL) munisípiu Baucau relata dadus ba nasionál relasiona ho pedidu konstrusaun edifísiu polísia eskuadra foun iha postu administrativu foun rua iha munisípiu Baucau.
Komandante PNTL Munisípiu Baucau, Superintendente João Sancho Pires, esplika komandu liuhosi Seksaun Administrasaun, Terras Propriedades hamutuk ho autoridade postu foun rua iha fulan-janeiru hala’o ona levantamentu dadus relasiona ho konstrusaun edifísiu referidu.
“Ita elabora tiha ona dadus sira-ne’e hotu no hato’o ona karta bá komandante jerál PNTL no sei enkamiña ba Ministru Interiór, bele karik tempu badak ka tinan ne’e halo konstrusaun ba eskuadra rua ne’e,” Komandante PNTL Munisípiu Baucau hateten iha ninia kna’ar fatin, Vila Nova, Baucau, kuarta ne’e.
Postu administrativu foun rua ne’ebé sei konstrui edifísiu eskuadra PNTL ba mak hanesan postu Quelicai Antiga (lokalizadu iha suku Afaça) no postu Matebian (lokalizadu iha suku Laisorulai de Cima) ne’ebé sei utiliza rai ho medida 100m².
Superintendente João Pires hateten ekipa halo ona levantamentu hanesan sukat rai no tuir planu aleinde halo konstrusaun ba edifísiu, konstrui mós kazerna ba membru PNTL sira ne’ebé futuru hala’o kna’ar iha postu foun rua referidu.
Governu liuhosi Ministériu Administrasaun Estatál (MAE) bazeia ba alterasaun datoluk dekretu-lei númeru: 11/2009, loron 07 novembru kona-ba devizaun administrativa territóriu, deside estabelese postu administrativu Matebian no Quelicai Antiga ne’ebé antes ne’e parte husi postu Quelicai.
Postu Matebian hamutuk suku lima kompostu Laisorulai de Cima, Laisorulai de Baixo, Maluro, Lelalai no Abo, enkuantu postu Quelicai Antiga hamutuk suku lima kompostu Afaça, Namanei, Uaitame, Guruça no Abafala.
Munisípiu Baucau iha postu administrativu hamutuk ualu kompostu husi Baucau Vila, Baguia, Laga, Vemasse, Venilale, Quelicai, Matebian no Quelicai Antiga ho tótal suku 62.
Jornalista: Natalino Belo
Editór: Xisto Freitas da Piedade
