DILI, 14 Fevereiru 2025 (TATOLI)—Treinadór prinsipál klube Boxe El-Matadór iha mehi atu lori boxista timoroan sai kampiaun mundiál iha loron aban.
Notísia Relevante: “Viva Delio, viva Daniel..!”
Treinadór prinsipál klube Boxe El-Matadór, Abilio Orlando dos Santos, hateten vitória ne’ebé boxista Delio no Daniel hetan iha eventu HSS Bali-Indonézia ne’e, hanesan faze primeiru tanba sira-nia esforsu ne’e seidauk másimu atu lori boxe Timor-Leste no boxista sai koñesidu hodi hamorin Timor-Leste nia naran iha mundu.
“Ida-ne’e foin primeiru. Ami hahú iha prosesu ida difisíl maibé ikus ita konsege hakat ba oin. Ha’u iha mehi ne’ebé boot. Ha’u hakarak ha’u-nia boxista sira tenke sai kampiaun mundiál. Sira balun teke lori sintu mai ita-nia nasaun,” Abilio tenik.
Iha fatin hanesan, Boxista Delio Mouzinho, hateten maske nia hetan ona vitória maibé nia parte sei esforsu liután hodi mantein prestasaun ne’ebé nia hetan ona ne’e, no sei esforsu aan nafatin atu sai dia’k-liu iha futuru.
“Ba oin, ha’u sei esforsu aan makaas. Hanesan, ohin, ha’u-nia treinadór hakarak ami tenke manán iha mundiál. Ida-ne’e mehi ida, maibé ami sei esforsu atu realiza mehi ne’e sai realidade,” Delio hateten.
Entretantu, treinadór prinsipál klube Boxe El-Matadór ne’e mós aseita ho mensajen husi Ministru Juventude Desportu Arte no Kultura (MJDAK) Nelyo Isaac Sarmento ne’ebé motiva Boxista na’in-rua Delio Anzaqeci Mouzinho no Deniel de Assis Belo atu labele halo-aan no haraik-aan nafatin bainhira hetan susesu.
“Mensajen Ministru MJDAK nian ne’e loos, ha’u aseita tebes katak boxista sira labele halo aan ho sira-nia rezultadu agora, labele kontente demais. Ida-ne’e ha’u konkorda tebes. Ida-ne’e liafuan motivasaun atu boxista prepara aan nafatin, tanba ba oin sei hasoru eventu ne’ebé boot no barak,” Treinadór prinsipál klube Boxe El-Matadór, Abilio Orlando dos Santos, hateten ba Agência TATOLI iha programa “Entrevista Eskluziva: iha estúdiu, Faról, sesta ne’e.
Abilio hato’o deklarasaun ne’e hodi responde ba públiku nia reasaun iha mídia sosiál hasoru Ministru Nelyo Isaac ne’ebé hato’o mensajen ba boxista na’in-rua (2), Delio no Daniel, ne’ebé susesu ka hetan vitória iha eventu HSS Bali-Indonézia foin lalais ne’e.
Delio nia vitória iha eventu HSS Bali
Boxista ho naran Delio Anzaqeci Mouzinho ne’ebé koñesidu ho naran istimadu Delio Mouzinho husi klube El-Matadór, ho nia esforsu no dixiplina mak nia marka tan istória foun ba Timor-Leste liliu iha mundu Boxe nian, bainhira nia tuku monu nia adversáriu husi nasaun Usbekistan, Alisher Ismailov, iha ronde da-rua bainhira minutu hatur iha 02,13 segundu.
Boxista Lafaek ne’ebé hatais kalsa kór mean ne’e hamonu Alisher ne’ebé utiliza roupa metan-mutin iha jogu HSS Bali, no eventu ne’e realiza domingu (09 nfevereiru 2025) kalan, iha Bali-Indonézia. Alisher monu bainhira simu Delio nia tuku makaas husi Delio nia liman-karuk kona-loos iha nia oin laran.
Iha loron ida ba kotuk, Boxista Usbekistan ne’e hatudu hirus-matan katak sai mani-aman loloos, halo aan hodi hatun Delio ho maneira oioin maibé ikus iha rin leten Delio hamonu nia ho Knock Out (KO).
Tuir kriteria ne’ebé iha Boxista na’in-rua tenke kompete to’o ronde neen, maibé foin tama iha ronde da-rua (2), Delio tuku monu ona Boxista Usbekistan ne’e, tanba ne’e árbitru konsidera KO hodi fó vitória ba Delio hanesan manán-na’in.
Bainhira jogu la’o iha ronde da-uluk, Boxista rua ne’e lansa kedan kontra no atake ba malu ho sira-nia liman rasik, maibé Delio komesa fó pankada ne’ebé makaas hasoru Alisher maibé Alisher sei antisipa no seidauk monu to’o ronde dahluk termina Delio provizoriu lidera jogu.
Hakat ba ronde da-rua, Delio tenta halo atake ne’ebé adekuadu, atake hirak ne’e la hela de’it ho atake maibé konsege tuku-monu Alisher hodi hako’ak metin kanfas-rin no hadeer mós la biban ona.
Ho prestasaun ne’ebé Delio hetan ne’e, lori ona Boxista raan Lafaek no husi rai QUINAMOCO ne’e kompleta nia BoxRec 3,0,0 (manán dala-tolu no nunka lakon dala ida).
Ho vitória ne’ebé Delio hatudu, ofisiál El-Matador no treinadór Abilio Orlando dos Santod halai tama rin leten hodi fó gloria ba Delio ho emosaun kontente. Delio hiit kedan bandeira RDTL halai haleu rin leten hodi hatudu ba mundu katak Timor-Leste mós bele no Timor-Leste nia naran mós bele morin iha mundu.
Hosi eventu ne’e, boxista Delio ho Deniel husi klube Boxe El-Matadór ne’e konsege hamorin ona Timor-Leste nia naran iha iha rejionál no mundu.
Notísia Relevante: Primeiru-Ministru kontente no kontinua apoia boxista Délio no Deniel
Jornalista : Hortencio Sanchez
Editór : Cancio Ximenes
