DILI, 13 Fevereiru 2025 (TATOLI) – Boxista timoroan husi El-Matador Boxing Club, Délio Anzaqeci Mouzinho no Deniel de Assis Belo, hasoru malu ho Primeiru-Ministru Xanana Gusmão, hafoin konkista vitória iha eventu Holywings Sport Show (HSS) iha Bali, Indonézia.
Prezidente Klube Boxe El-Matadór no Treinadór Abílio Orlando dos Santos, hateten boxista na’in-rua ne’e bá hasoru xefe Governu, tanba antes bá kompete iha HSS Bali, sira kumprimenta uluk primeiru-ministru.
“Ita-nia boxista na’in-rua antes bá partisipa HSS Bali, primeiru-ministru apoia orsamentu ba ekipa boxista kompete iha jogu. Antes ne’e bá despede primeiru-ministru, entaun mai fali mós tenke hasoru malu direta, fó rezultadu husi kompetisaun ne’ebé sira partisipa”, Abílio Orlando hateten iha Palásiu Governu, ohin.
Iha sorumutu ne’e, primeiru-ministru ne’e kontente ho rezultadu ne’ebé boxista na’in-rua ne’e hetan iha HSS Bali. “Primeiru-ministru dehan sei apoia nafatin boxista sira, tanba ida lori Timór ba mundu no husu sira disiplina, kontinua treinu di’ak ba talentu ne’ebé iha”, nia dehan.
Abílio Orlando relata katak primeiru-ministru disponibiliza $3.400 ba sira hodi partisipa iha eventu ne’e.
Iha fatin hanesan boxista, Délio Anzaqeci Mouzinho, agradese ba Maromak no erói sira Timor-Leste ne’ebé mate ba rai ida-ne’e, nomós ba timoroan tomak ne’ebé apoia ona sira. “Susesu ne’ebé ami hetan ne’e ita hotu nia susesu. Espera katak hau bele kontinua tan buat ne’ebé ha’u esforsu”, Délio hateten.
Nia lembra katak bainhira iha riin leten, nia tuku kona nia adversáriu monu ba rai, nia parte sente kontente tebes tanba ida ne’e hanesan prezente ida ba Timor-Leste. “Iha momentu ne’ebá mós ha’u-nia tinan [04/02/2025]. Ha’u-nia treinadór dehan ba ha’u, buat hotu ha’u sei lafó, ha’u-nia prezente mak fó manán ba ha’u. Ida-ne’e sai realidade katak ha’u-nia manán sai prezente ba treinadór no ba Timor-Leste”, nia afirma.
Iha biban ne’e mós nia parte husu ba Timor-oan hotu nia apoia ba nia, tanba fulan-Marsu nia sei bá kompete no treinu tan iha Kanadá no Jullu mak filafali ba tuir kompetisaun iha Jakarta.
Délio agradese ba patrosinadór hotu tantu husi Governu komu privadu sira hanesan Vise-Primeiru-Ministru Mariano Sabino Asanami, Ministru Juventude Desportu, Arte no Kultura, Nelyo Isaac Sarmento, Timor Telecom, Caltech, Bee Leste no seluk tan.
Lembra katak boxista timoroan Deniel Assis Belo no Délio Anzaqeci Mouzinho susesu iha jogu Boxe HSS Bali hodi tuku monu nia adversariu Sakti Manulag husi Indonézia iha riin leten durante ronda datoluk no tuku monu nia adversariu husi nasaun Usbekistan Alisher Ismailov iha ronda daruak, respetivamente, iha domingu kalan loron 09 Fevereiru, iha Bali, Indonézia. Husi vitória ne’ebé hetan, Délio ho Deniel hamorin ona Timor-Leste nia naran.
Notísia relevante: “Viva Delio, viva Daniel..!”
Jonalista: Arminda Fonseca
Editora: Maria Auxiliadora
