DILI, 13 Fevereiru 2025 (TATOLI)—“Viva, viva, viva Delio-Daniel..!” Lian hakilar husi ema wa’in, husi família no timoroan nia ibun ne’e, semo aas ho anin be huu nia rítmu, halo ema wa’in be hein atleta na’in-rua ne’e hetok haksolok be haksolok.
Notísia Relevante: Boxista Delio Anzaqeci hamonu Alisher iha ronde daruak
Boxista timoroan na’in-rua, Delio Anzaqeci Mouzinho no Deniel de Assis Belo, ne’ebé hamorin Timor-Leste nia naran iha eventu HSS Bali-Indonézia ne’e, ne’ebé akompañadu husi treinadór Abilio Orlando dos Santos ne’e ho aviaun Air Timor to’o iha Aeroportu Internasionál Prezidente Nicolau Lobato, Komoro, iha tuku 13h35 oras Timor-Leste (otl).
Ksolok ne’e sei la nahas tanba boxista na’in-rua ne’e simu direta husi família hanesan simu luta-na’in ka eroi ida sai eroi tebes. Domin ba nia oan na’in-rua, ksolok ne’ebé família espresa mak liuhusi kahe (tara) tais ba Delio, Deniel no treinadór no asistente treinadór. Tais ne’e tada domin nian. Tais ne’e tada ksolok nian. Tais ne’e hatada eroi foun na’in-rua (Delio no Daniel) ne’ebé hamorin Timor-Leste nia naran iha mundu liuhusi boxe.
“Viva, viva, viva Delio-Daniel,” timoroan wa’in hakilar ho oin ksolok hodi simu boxista Delio no Daniel.
Sentimentu ksolok nia lalatak ita bele haree-hetan iha boxosta Delio no Daniel nia matan. Sira na’in la mehi kona, eh, ohin loron ne’e ema wa’in ba wa’in hakonu iha área Aeroportu Nicolau Lobato hodi simu sira. Sira na’in-rua la imajina, tais dominion ne’e kahe iha sira-nia kakorok.
Nune’e. ramata kahe tais, atleta na’in-rua ho treinadór no familia sa’e kedan ba kareta ho marka Jeep kór metan, ne’ebé hetan kedan seguransa husi Polísia Nasionál Timor-Leste (PNTL) Unidade Trânzitu. La sente, karik baibain la’o mós ema la fó seguarnsa maibé loron ida ohin ne’e sai oin seluk—sa’e karreta de’it mós segurans ametin be emtin.
“Viva, viva, viva Delio-Daniel,” ema hirak ne’ebé hamriik iha dalan ninin sira-ne’e hakilar be hakilar. “Viva, viva, viva Delio-Daniel”.
Ema wa’in hein hodi simu atleta na’in rua ne’e ho domin. Koslok no domin sira-ne’e sira espresa liuhusi halo konvoiu husi Aeroportu Internasionál Prezidente Nicolau Lobato to’o Palásiu Governu, Dili, tanba tuir oráriu ne’ebé iha tuku 15h30, boxista na’in-rua ne’e sei hasoru malu direta ho Primeiru-Ministru, Kay Rala Xanana Gusmão.
Iha estrada ninin área Comoro to’o Palásiu Governu nia oin, karreta no motirizada ne’ebé apita tutuir dalan, ema wa’in ba wa’in hamriik iha dalan ninin be naruk be naruk—husi Comoro to’o Palásiu Governu ne’e—hamriik tuku liman ba anin leten hodi simu atleta na’in rua ne’e hodi haklalak.
“Viva, viva, viva Delio-Daniel,” ema hirak ne’ebé hamriik iha dalan ninin sira-ne’e hakilar be hakilar. “Viva, viva, viva Delio-Daniel”.
Komunidade ida-ne’ebé hamriik atu simu Delio no Daniel ho naran Mario Gomes hato’o nia sentimentu ksolok liuhusi matan-been, tanba boxista timoroan na’in-rua ne’e konsege hamorin Timor-Leste nia naran.
“Ita orgollu ba sira na’in-rua, sira hamorin ona ita-nia nasaun nia naran. Ha’u matan been monu bainhira Delio manán Boxista Uzbekistan ne’e ho KO (knock out), nia hiit ita-nia Bandeira RDTL, halo ha’u matan-been monu. Tanba, sira bele hamorin ita-nia nasaun, sira na’in-rua ita konsidera ona hanesan eroi foun iha mundu desportiva,” Mario hateten ba Agência TATOLI, iha Beto, Dili, kinta ne’e.
Atu sai eroi ba nafatin, nia husu, atu boxista na’in-rua ne’eatu kontinua mantein dixiplina hodi treinu no kontinua promove sira-nia talentu ne’e ba oin tanba luta sei naruk.
Notísia Relevante: Boxista Delio Mouzinho-Daniel Belo sei kompete iha eventu HSS Bali
“Lia-menon ba sira mak ne’e, bele kontente maibé nafatin esforsu aan makaas liutan. Luta sei naruk. Bainhira manán hanesan ne’e, boxista barak mak tau matan hakarak husu atu sa’e rin tan ho sira. Ne’ebé, alin na’in-rua tenke prepara aan ho dixiplina nafatin, mantein imi-nia talentu, lori nafatin Timor ba mundu,” nia dehan.
Quinamoko nia oan na’in-rua (2), Delio no Daniel, ba loron ida ohin (kinta, 13 Fevereiru 2025), sira-na’in rua sai tebes duni eroi foun iha Timor-Leste no sai joven inspiradór ba joven sira seluk atu moris banati.
“Viva, viva, viva Delio-Daniel,” ema hirak ne’ebé hamriik iha dalan ninin sira-ne’e hakilar be hakilar. “Viva, viva, viva Delio-Daniel”.
Delio-Daniel nia vitória
Boxista timoroan ho naran istimadu Deniel Assis Belo susesu iha jogu Boxe HSS Bali hodi tuku monu nia adversáriu Sakti Manulang husi Indonézia iha rin leten iha ronde da-tolu, domingu (09/02) kalan, iha Bali-Indonézia.
Tuir kriteria jogu, Deniel ho nia adversáriu tenke joga to’o ronde da-haat, maibé ho forsa ne’ebé iha Deniel komsege hamonu Sakti iha ronde da-tolu.
Durante jogu la’o, Boxista na’in-rua lansa kontra no atake ba malu iha rin leten, maibé Deniel hatudu nia forsa ne’ebé brillante iha ronde da-tolu. Vitoria ne’e fó kslok tebes ba povu Timor-Leste.
Boxista hosi klube El-Matador Boxe ne’e tenke loke liras, hafalun ho bandeira RDTL iha nia isin, akompaiña husi nia treinadór Abilio Orlando dos Santos haksoit iha rin leten bainhira nia Boxita manán ho rezultadu KO.
Enkuantu, Delio Anzaqeci Mouzinho marka tan istoria foun ba Timor-Leste iha mundu Boxe bainhira tuku monu nia adversáriu husi nasaun Usbekistan Alisher Ismailov iha ronde da-rua bainhira minutu hatuur iha 02, 13 segundu.
Boxista Lafaek ne’ebé utiliza kalsa mean ne’e hamonu Alisher ne’ebé utiliza kalsa metan-mutin iha jogu HSS Bali no eventu ne’e, realiza domingu kalan iha Bali Indonézia. Alisher monu bainhira simu Delio nia pankada ne’ebé nia (Delio) utiliza ho liman karuk rabenta iha oin-laran.
Iha loron ida ba kotuk, Boxista Usbekistan ne’e loko aan, halo aan hodi hatun Delio ho maneira oioin maibé ikus iha rin leten Delio hamonu nia ho KO.
Tuir kritéria ne’ebé iha Boxista na’in-rua tenke kompete to’o ronde neen, maibé foin tama iha ronde da-rua Delio tuku monu ona Boxista Usbekistan ne’e, tanba ne’e árbitru konsidera KO vitória monu kedan ba Delio.
Bainhira jogu la’o iha ronde da-uluk, Boxista rua ne’e lansa kedan kontra no atake ba malu ho sira nia liman rasik, maibé Delio komesa fó pankada ne’ebé maka’as hasoru ona Alisher, maibé Alisher sei antisipa no seidauk monu to’o ronde da-uluk termina Delio provizóriu lidera jogu.
Hakur ba ronde da-ruak Delio tenta halo atake ne’ebé adekuadu, atake hirak ne’e la hela de’it ho atake maibé konsege fó haan duni Alisher monu la hader.
Ho prestasaun ne’ebé Delio iha lori ona Boxista ran Lafaek ne’e kompleta nia BoxRec 3,0,0.
Ho vitoria ne’ebé Delio hatudu ofisiál El-Matador no treinadór Abilio Orlando dos Santod halai tama rin leten hodi fó gloria ba Delio ho emosaun kontente. Delio hiit kedan bandeira RDTL halai haleu rin leten hodi hatudu Timor-Leste mós bele.
Hosi jogu ne’e Delio ho Deniel konsege hamorin ona Timor-Leste iha mundu internasionál.
Jornalista : Hortencio Sanchez
Editór : Cancio Xumenes
