DILI, 09 Fevereiru 2025 (TATOLI) – Boxista ho naran istimadu Delio Mouzinho Anzaqeci, husi klube El-Matador, marka tan istoria foun ba Timor-Leste iha mundu Boxe bainhira tuku monu nia adversariu husi nasaun Usbekistan Alisher Ismailov iha ronde daruak bainhira minutu hatur iha 02,13 segundu.
Boxista husi rai Lafaek ne’ebé utiliza roupa mean tuku monu Alisher ne’ebé utiliza roupa metan-mutin iha jogu HSS Bali-Indonézia. Alisher monu bainhira simu Delio nia pankada ne’ebé nia (Delio) utiliza ho liman karuk rabenta kedas iha oin-laran no la konsege hader kedan.
Iha loron ida ba kotuk, Boxista Usbekistan ne’e loko aan, halo aan hodi hatun Delio ho maneira oioin, maibé ikus iha rin leten Delio hamonu nia ho KO.
Tuir kritéria ne’ebé iha Boxista na’in-rua tenke kompete to’o ronde neen, maibé foin tama iha ronde daruak Delio tuku monu ona Boxista Usbekistan ne’e, tanba ne’e árbitru konsidera KO vitória monu kedan ba Delio.
Bainhira jogu la’o iha ronde dahuluk, Boxista rua ne’e lansa kedan kontra no atake ba malu ho sira nia liman rasik, maibé Delio komesa fó pankada ne’ebé maka’as hasoru ona Alisher, maibé Alisher sei antisipa no seidauk monu to’o ronde dahuluk termina Delio provizóriu lidera jogu.
Hakur ba ronde daruak Delio tenta halo atake ne’ebé adekuadu, atake hirak ne’e la hela de’it ho atake maibé konsege fó kona duni Alisher no monu la hader.
Ho prestasaun ne’ebé Delio iha lori ona Boxista rai Lafaek ne’e kompleta nia BoxRec 3,0,0.
Ho vitória ne’ebé Delio hatudu ofisiál El-Matador no treinadór Abilio Orlando dos Santos halai tama rin leten hodi fó gloria ba Delio ho emosaun kontente. Delio hiit kedan bandeira RDTL halai hale’u rin leten hodi hatudu Timor-Leste mós bele.
Hosi jogu ne’e Delio ho Deniel konsege hamorin ona Timor-Leste iha mundu internasionál.
Notisia relevante:Boxista Deniel “tuku monu” Sakti iha ronde datoluk
Jornalista: Hortencio Sanchez
Editór: Florencio Miranda Ximenes
