BAUKAU, 14 Fevereiru 2025 (TATOLI)—Situasaun klima hanesan udan no anin-boot durante loron tolu rezulta uma komunidade hamutuk 23 hetan estragu iha munisípiu Baukau.
Komandante Opersionál Autoridade Protesaun Sivíl munisípiu Baukau, Francisco Viana Freitas, esplika uma-kain hirak-ne’e hetan estragu kauza husi udan akompaña anin-boot hahú husi loron 09-12 Fevereiru ne’ebé afeta uma sira hetan estragu iha territóriu Baukau.
“Dadus ne’ebé rekolla hamutuk uma-kain 23. Ami sei halo verifikasaun antes apoia emerjénsia,” Komandante opersionál APC Baukau hateten iha ninia kna’ar fatin, Vila Antiga, Baucau, kinta ne’e.
Husi númeru ne’ebé rejistadu, APC Baukau apoia ona materiál emerjénsia ba uma-kain neen, enkuantu restu iha faze verifikasaun no planu ne’ebé iha sei distribui apoia iha ohin (14/02) tuir kondisaun klima no transporte.
Dezastre naturál iha Baukau durante fulan fevereiru maioria akontese anin-boot sobu uma komunidade iha postu Baguia, Laga, Kelikai, Venilale no Baukau Vila.
“Dadus loloos seidauk iha ami-nia liman. Bainhira iha ona ami sei informa,” Francisco Freitas akresenta.
APC Baukau sei verifika tuir uma-kain 23 ne’e hodi hatene loloos kategória hanesan aat kamaan, natoon no totál, nune’e sei envia dadus bá nasionál hodi apoia materiál rekuperasaun.
Entretantu, apoia emerjénsia ne’ebé sei distribui kompostu hahán hanesan fós, mina, supermie no la’ós hahán kompostu lona, ekipamentu, sasán koziña no seluk tan.
Jornalista: Natalino Belo
Editór: Xisto Freitas da Piedade
