BOBONARU, 18 Fevereiru 2025 (TATOLI)—Administradór postu administrativu Bobonaru, munisípiu Bobonaru, Tomás Henriques, segunda ne’e, marka audiénsia ho Ministru Obra Públika (MOP), Samuel Marçal, hodi hato’o povu nia preokupasaun kona-bá kondisaun estrada liga husi kapitál Maliana ba postu administrativu Bobonaru no postu Loloto’e.
Durante sorumutu kuaze minutu 15 nia laran ne’e, administrador mós konfirma fali pedidu normalizasaun estrada husi suku Oe-leu ba to’o Hauba, ne’ebé submete iha Agostu 2024. Aleinde ne’e, relata mós kona-bá projetu reablitasaun estrada ligasaun suku Bobonaro villa ba aldeia Tuluata, Ai-Asa, no husi suku Sibuni liga ba suku Molop ne’ebé daudaun ne’e paradu hela.
Notísia Relevante: Autoridade lokál preokupa bee nalihun iha estrada ligasaun Maliana-Bobonaro
“Ha’u relata pontu neen (6) ba ministru maibé ha’u prefere liu mak estrada ida husi Maliana mai Bobonaru ne’e, tanba hein tan udan oituan estrada aat totál. Agora grave, bee-nalihun bara-barak iha. Ha’u agradese señor ministru bele ko’alia ho ha’u,” Nia informa ba Agência Tatoli liuhusi telefónika, segunda ne’e.
Iha sormutuk ne’e, nia dehan, ekipa tékniku MOP nian relata katak estrada liga husi suku Oe-leu ba suku Lourba iha ona dezeñu no daudaun ne’e prosesa hela, maibé husi suku Lahomea, postu administrativu Maliana liga ba suku Oe-leu to’o ágora seidauk no iha tempu badak ekipa tékniku sira sei tun fila-fali ba terrenu hodi ho levantamentu dadus.
Iha biban ne’e, Ministru Samuel Marçal hamutuk ho asesór tékniku sira mós konfirma katak estrada liga suku Lahomea, postu administrativu Maliana ba to’o postu administrativu Bobonaro seidauk tama planu prioridade atu halo Konstrusaun.
“Ami rua ko’alia, ha’u dehan ba senór Ministru, se ida-ne’e mak kuandu la haree, ha’u sei lori xefe suku hitu husi Loloto’e, 18 husi postu Bobonaru, ami sei lori proposta konjunta ida ba hasoru Primeiru-Ministru,” nia dehan.
Iha fatin seluk, komunidade Bobonaru, Santiago Lopes, rekomenda ba Governu atu aselera lalais prosesu tanba kondisaun estrada ne’e difikulta tebes movimentasaun públiku liuliu iha tempu udan.
“Se bele Governu tau matan netik ba ami-nia estrada ne’e, tinan barak ona ami halerik. To’o ohin loron, ami Bobonaru ne’e susar nafatin. Udan hanesan ne’e, la’o ba-mai ho motorizada mós ladi’ak, ho karreta entaun aat liután. Tanba, ita haree ho matan, dalan sira-ne’e taho mak nakonu, bee-debu mós iha fatin-fatin. Udan hanesan ne’e, ita haree estrada hanesan mota ho natar fali, tanba alkatraun tuan sira-ne’e aat—laiha hotu ona, entaun taho mak lekar iha Estrada laran,” nia dehan.
Aleinde ne’e, Motorista Kamioneta, José Pinto de Jesús, reforsa hafoin akontese udan boot durante semana ida-ne’e, afeta tebes ba estrada iha fatin tolu ou haat mak ameasa atu kotu.
“Ita husi Bobonaru mai, pas iha kruzamentu Oe-leu nian, sorin monu tan no hela de’it rohan. Tun mai tan liu tiha Ili-Bole ne’e mós ponte oan ida iha ne’e atu kotu ona, ema tau de’it fatuk mak karreta ho motorizada sira liu. Depois mai fali iha Odomau, iha Odamatan Boot (Pintu Gerbang) nia okos ne’e mós rai iha kra’ik monu tomak tiha hela de’it karreta ida-nia dalan, hasoru malu ladi’ak, ida liu tiha mak seluk liu fali. Maibé, se udan mai tan agora ne’e, Estrada sira ne’e kotu totál de’it ona. Movimentu paradu tanba dalan seluk laiha ona,” nia hateten.
Enkuantu, iha tinan 2019, Governu liuhusi Ministériu Transporte no Telekomunikasaun kontrata empreza lokál Vieramor Unipesoál, Lda, konstrui ponte no halo manutensaun ba estrada husi Lahomea ba to’o suku Oeleu, maibé to’o ágora projetu emerjénsia gasta orsamentu millaun $2-resin ne’e seidauk finaliza no paradu hela.
Notísia Relevante: Komunidade preokupa projetu manutensaun estrada Maliana-Bobonaro
Jornalista : Sérgio da Cruz
Editór : Cancio Ximenes
