DILI, 26 Fevereiru 2025 (TATOLI)—Adjuntu Delegasaun Rejionál International Committee of the Red Cross (ICRC) Indonézia ba Timor-Leste, Johan Guillaume, ho Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, selebra nota entendimentu kona-ba formasaun Lei Umanitária Internasionál ba membru F-FDTL.
“Objetivu MoU ida-ne’e atu kontinua de’it ba iha estensaun servisu ne’ebé mak ita halo hamutuk ona ho F-FDTL atu hasa’e koñesimentu liuhusi formasaun sira ba iha Lei Umanitária Internasionál bainhira iha tempu konflitu nian laran,” Johan hateten ba jornalista sira hafoin selebra nota entendimentu ho Komandu FALITIL-Forsa Defeza Timor-Leste (F-FDTL) ne’ebé hala’o iha Kuartél Jenerál F-FDTL, Fatuhada, Dili, kuarta ne’e.
Nia esplika katak formasaun referida sei liuhusi semináriu ka workshop. Nia lori ICRC nia naran kongratula Krúz Vermella Timor-Leste (CVTL-sigla portugés) tanba durante ne’e CVTL sai ona parseiru ba ICRC hodi halo servisu fó asisténsia umanitária ba komunidade iha Timor-Leste.
Iha fatin hanesan, Xefe Estadu Maiór Jenerál F-FDTL, Tenente Jenerál Falur Rate Laek, konsidera katak memorandu ida-ne’e simboliza kooperasaun ho forsa defeza para prepara forsa nian formasaun kona-ba vizaun umanizmu ka umanitária no direitu umanu, tanba militár sira kuandu bá halo asaun ruma sempre komete violasaun direitu umanu barak.
“Ohin iha-ne’e, ha’u ko’alia dehan katak ita-nia relasaun entre forsa defeza, Krúz Vermella Intenasionál ne’e la’ós foin hahú. Ne’e komesa kedas iha tempu difísil nia laran. Sira asumi pesa importante ba libertasaun nasionál tanba sira fó apoiu umanitáriu no fó mós dadus violasaun direitu umanu bá iha mundu tomak iha tempu rezisténsia,” Falur tenik.
Jornalista: Natalino Costa
Editór: Xisto Freitas da Piedade
