KOVALIMA, 04 Marsu 2025 (TATOLI) – Sekretaria Estadu Formasaun Profesionál no Empregu (SEFOPE), Kovalima, rejista ona kandidatu traballadór na’in-270 mak sei tuir formasaun dalen inglés ba faze segundu.
“Ita fó sai avizu ba kandidatu traballadór ne’ebé mak rejista naran atu tuir formasaun iha loron 10, tanba iha loron 11 Marsu ne’e, halo ona abertura formasaun lian inglés ba faze daruak”, Diretór SEFOPE Kovalima, Stefanus Segundo Manek, dehan ba TATOLI , iha nia Servisu Fatin Tabakolot, ohin.
Kandidatu traballadór ne’ebé mak atu tuir formasaun dalén inglés iha Eskola Tékniku Vokasionál Akar Laran uza sala-de-aula rua lokaliza iha Suai Loro no sala-de-aula ida sei uza husi SKA lokaliza iha Tali oan .
Durante SEFOPE loke formasaun dalén inglés ne’e, Diretór SEFOPE observa katak, kandidatu traballadór ne’ebé mak tuir formasaun ne’e iha duni vontade atu aprende dalen inglés.
Tuir dadus kandidatu traballadór Austrália ne’ebé mak durante tuir formasaun hamutuk 540 ne’ebé faze dahuluk na’in-270 maske finaliza ona sira-nia formasaun dalen inglés, maibé seidauk simu sira-na sertifikadu no ba faze daruak na’in-270 sei tuir formasaun.
Bazeia ba dadus iha SEFOPE kandidatu traballadór ne’ebé la pasa tuir teste eskrita hamutuk rihun-ida resin nune’e SEFOPE nafatin fasilita formasaun ba kandidatu traballadór referidu.
Fó hanoin fali katak, Sekretaria Estadu Formasaun Profesionál no Empregu (SEFOPE), fó teste ba kandidatu traballadór husi Kovalima hamutuk 3,184 iha loron 2 Marsu 2024 ne’e.
Enkuantu tuir dadus timor-oan ne’ebé konkorre vaga liuhusi sistema online iha territóriu hamutuk rihun-51 inklui mós kandidatu traballadór husi munisípiu Kovalima.
Jornalista: Celestina Teles
Editór: Rafael Ximenes de A. Belo
