DILI, 06 Marsu 2025 (TATOLI)–Parlamentu Nasionál (PN) no UN Women sei asina nota entendimentu ba kooperasaun serbisu hodi promove asuntu igualdade jéneru iha Timor-Leste, iha ámbitu komemorasaun loron internasionál Feto.
Mundu tomak iha loron 08 Marsu sei komemora loron internasionál Feto ho tema ‘Feto no Labarik Feto iha ninia Direitu, Igualdade no Empoderamentu’.
Nune’e, PN liuhusi Grupu Feto Parlamentu Timor-Leste (GMPTL, sigla portugés) iha 07 Marsu sei komemora loron internasionál ne’e, iha salaun Delta Nova, Komoro, ne’ebé iha biban ne’e sei asina nota entendimentu entre PN no UN Women.
“Realiza asina MoU (nota entendimentu) entre Parlamentu Nasionál ho UN Women iha Timor-Leste, suporta liubá Parlamentu hodi haree liubá asuntu feto,” Prezidente Komisaun F ne’ebé trata asuntu Saúde, Igualdade Jéneru no Inkluzaun Sosiál, Maria Gorumali Barreto, informa iha resintu PN, kinta ne’e.
Notísia relevante : Prezidente Komisaun F husu entidade hotu promove hasa’e partisipasaun feto
Akordu kooperasaun ne’e sei haree liubá asuntu feto no asuntu orsamentu sensível jéneru ne’ebé balun alokadu husi Orsamentu Jerál Estadu (OJE) no husi ne’e planu asaun anuál Governu ninian responde ba iha asuntu jéneru.
“Akordu ne’e espesífiku liu, dahuluk mak sira fó apoiu ba asuntu igualdade jéneru ba Parlamentu, inklui komisaun espesializada permanente iha PN no apoiu asuntu orsamentu sensível jéneru,’’ nia akresenta.
Deputada ne’e dehan, agora atu haree orsamentu Estadu responde mós ba iha portadór jéneru husi Governu, ne’ebé apoiu téknikamente ba Deputadu sira iha Komisaun sira, liuliu Komisaun F.
Jornalista : Nelson de Sousa
Editora : Julia Chatarina
