DILI, 10 Marsu 2025 (TATOLI)–Komandante Em Xefe FALINTIL, Kay Rala Xanana Gusmão, nia abrigu subar fatin hanaran “OI” ne’ebé lokaliza iha suku Mehara, postu Tutuala, munisípiu Lautein ne’e, hanesan universidade ida ba Xanana halo konseitu faze gerrilla hodi reorganiza funu atu luta ba libertasaun nasionál.
Notísia Relevante: Governu planeia dezenvolve abrigu Xanana Gusmão iha Lautein
“Ha’u-nia universidade gerrilla iha “OI”. Iha fatin ne’eba ha’u buka lee-livru barak, aprende kona-ba gerrilla iha Vietname, gerrilla iha Cuba, gerrillia iha Angola atu analiza. Iha Timor-Leste ne’e, ita bele aplika mak ida-ne’ebé,” Primeiru-Ministru. Kay Rala Xanana Gusmão hateten ba Agência TATOLI iha Palásiu Prezidensiál Nicolau Lobato, Bairru Pité, kinta (06 Marsu 2025) ne’e.
Líder rezisténsia ne’e hateten, funu iha nasaun ne’ebé de’it bele utiliza kilat oioin maibé falla iha estratéjia ne’e susar tebes atu manán funu.
“Ida ne’e mak ha’u apreende katak, funu iha ne’ebé de’it, ho kilat ne’ebé hanesan, maibé iha rai seluk aplika oin seluk, iha Timor aplika oin seluk tuir rai nia karáteristika. Ida-ne’e mak ha’u aprende iha tempu ne’ebá mak ita foin bele auguenta,” Xanana tenik.
Nia hatutan, Timor-Leste lakon tia funu iha tinan 1979 tanba populasaun, forsa no komandante barak mate ona no balun ba rende ba inimigu sira iha vila.
“Ita lakon tiha funu iha tinan 1979, ita lakon tiha funu, rende hotu, balun mate, Ita hahú fali gerrilla ne’e, hahú husi 1980 to’o 1999 ne’e,” Xanana dehan.
Prezidente Autoridade Munisípiu (PAM) Lautein, Melio de Jesus, hateten Governu planeia atu dezenvolve abrigu Komandante Em Xefe FALINTIL, Kay Rala Xanana Gusmão, nia subar fatin iha fatin rezisténsia “OI” ne’ebé lokaliza iha suku Mehara ne’e atgu sai sítiu turístiku rezisténsia iha lautein.
Daudaun ne’e, PAM Lautein servisu hamutuk ho Arkivu Muzeu Rezisténsia Timorense, Institutu Públiku (AMRT, I.P) ho ekipa akompaña ho Ajénsia Dezenvolvimentu Nasionál, Institutu Públiku (ADN, I.P) ne’ebé ninia prosesu hala’o hotu ona, tanba ekipa tékniku husi parte rua halo ona levantamentu dadus ba fatin istóriku “OI” atu atu konstrui estrada no hatuur plaka iha fatin istóriku ne’e.
“Fatin “OI” ne’ebé lokaliza iha Mehara, fatin ne’e, uluk, ema hotu hatene katak ita-nia Maun Boot Kay Rala Xanana Gusmão hela iha ne’ebá hodi halo reorganizasaun funu. Maun Xanana rasik mós ko’alia katak fatin ne’e hanesan universidade ka polítiku, tanba fatin ne’e rasik Maun Xanana halo konseitu faze gerrillia hodi reorganiza funu,” Prezidente Autoridade Munisípiu (PAM) Lautein, Melio de Jesus, hateten ba Agência TATOLI iha Lautein, tersa (04 Marsu 2025) ne’e.
Notísia Relevante: Vizita Lalehan “Resistir é Vencer!” (IV-Ramata)
Jornalista : Hortencio Sanchez
Editór : Cancio Ximenes
